DILI, 17 Fevereiru 2025 (TATOLI)—Deputadu Bankada Governu husi Congresso Nacional da Reconstrução Timorense (CNRT), Cedelízia Farria dos Santos, levanta kestaun engarramentu iha kapitál nasaun, nune’e husu ba parte kompetente atu tau atensaun.
“Ha’u iha preokupasaun hakarak foti kona-ba engarramentu ne’ebé akontese maka’as iha Dili laran, liuliu iha sumáforu iha Igreja Balide nian,” Deputada hato’o liuhusi reuniaun plenária, Parlamentu Nasionál (PN), segunda ne’e.
Nia dehan, parte Balide iha Igreja no eskola barak, tanba ne’e bainhira sinál tránzitu la funsiona tanba daudaun halo hela reabilitasaun, maka presiza koloka Polísia Tránzitu iha fatin ne’e hodi evita engarrafamentu makas’as.
“Afeta estudante ne’ebé inan-aman lori bá eskola, iha tempu hanesan ne’e barak mós bele tarde bá eskola,” nia akresenta.
Notísia relevante : Empreza Javis Teknologi hahú serbisu instalasaun ba semáforu modernu iha fatin haat
Nune’e mós, Deputadu Bankada Opozisaun husi Frente Revolucionária de Timor-Leste Independente (FRETILIN), Florentino Ximenes, sujere tau semáforu iha área Elemloi Komoro tanba iha tempu lorokraik sempre akontese engarramentu maka’as.
Deputadu CNRT, José Virgílio, husu atu pinta foun zebra cros iha estrada públiku hodi fasilita sidadaun sira ultrapasa iha estrada.
Deputada CNRT, Maria da Rosa Câmara Bisoi, preokupa tanba iha tempu udan haree motorista balun kondús motorizada no karreta ho velosidade maka’as, ne’ebé fó risku tebes ba dezastre, nune’e husu ba Diresaun Nasionál Transporte Terrestre (DNTT) no Polísia Tránzitu atu halo kontrolu.
Vise-Ministru ba asuntu Parlamentár, Adérito Hugo da Costa, rejista preokupasaun sira no kompromete sei enkamiña ba ministériu tutela hodi tau atensaun.
Jornalista : Nelson de Sousa
Editora : Julia Chatarina
