KOVALIMA, 17 fevereiru 2025 (TATOLI) – Servisu Munisípiu Edukasaun Kovalima sei submete pedidu ba Ministériu Edukasaun (ME), kona-ba Eskola Bázika Filiál Matai husi Postu administrativu Maukatar, Munisípiu Covalima, ne’ebé nia konstruisaun finaliza ona maibé seidauk iha mobiliáriu eskolár.
Diretora Servisu Edukasaun Munisípiu Kovalima, Elda de Fatima esplika katak, Edukasaun Kovalima la iha koñesementu bainhira empreza manan konkursu públiku iha dezeñu BoQ (Bill of Quantity – montante orsamentu) konstrui de’it eskola.
“Implementa projetu PDIM konstrui EBF Matai ami hanoin katak kompleta ho mobiliáriu eskolár, maibé to’o ikus la kompleta. Ami sei submete pedidu fali ba nasionál tanba iha 2024 la tau. Ita hein 2026”, Elda de Fatima klarifika ba jornalista sira iha Santa Rosa, ohin.
Ho nune’e dirijente ne’e dehan, ho problema eskola la iha mobiliáriu eskolár bainhira edukasaun submete pedidu labele responde kedan, maibé sei liuhusi prosesu.
“Iha 2025 ita la tau kadeira meza ami hanoin konstruisaun projetu PDIM prepara kedas mobiliáriu eskolár tanba la relata mai ami dehan katak halo de’it eskola la sosa mobiliáriu eskolár ita hein 2025 la garante tanba la tau iha planu”, nia dehan.
Edukasaun Kovalima la’ós tau matan ba eskola ida de’it maibé totál eskola 153. Husi númeru ne’e, eskola 24 mak sei aat hela maske submete ona planu maibé sei responde ho fazeadamente tanba iha 2025 eskola 13 mak tama lista no eskola seluk sei tama iha planu 2026.
Tuir dadus eskola ne’ebé mak tama iha lista atu konstrui no reabilita iha tinan-2025 ne’e mak eskola EBC Fatululik, EBF 1,2 Salele, EBC Bulo, EBF Lorokida, EBF Macous, EBF Goronto, Aidantuik, Lakalese, Dato Rua, Koitau, Lakonak, Pelet no Halik.
Notísia relevante:Implementa ona projetu PDIM Ualu Iha Covalima
Jornalista:Celestina Teles
Editór :Rafael Ximenes de A. Belo
