DILI, 17 Fevereiru 2025 (TATOLI)–Sekretáriu Estadu Asuntu Toponimia no Organizasaun Urbana (SEATOU), Germano Santa Brites, dehan Montana Diak hahú sobu uma ba alargamentu estrada hosi Kuluhun to’o Bekora Fatu-ahi nian.
Kona-ba despezu administrativu ne’e, Governu liuhosi Ministériu Obra Públika (MOP) servisu hamutuk ho Terras Propriedade no Sekretáriu Estadu Asuntu Toponimia no Organizasaun Urbana (SEATOU) halo ona enkontru ho populasaun Kuluhun no Bekora hodi sobu uma, kios no baraka sira.
“Ohin fulan ida semana ida liu ona, hakarak ka lakohi tenke aselera ona servisu ne’e, nune’e ita hakas-aan alarga estrada ne’e hodi bele evita engarafamentu”, SEATOU dehan ba TATOLI iha Kuluhun, segunda ne’e.
Nia dehan kalen ho besi ne’ebé sira nain sobu bele sobu rasik ona maibé ida-ne’ebé todan hanesan moru ne’ebé cor metin ne’e tenke ajuda sobu.
“Tuir dezeñu ne’ebé mak MOP iha katak sira mak sei instala no hakoi iha rai okos. Tanba populasaun halo uma iha dalan ninin estrada nian la tau konsiderasaun ai-rin eletreisidade sira, ita haree ai-rin eletrisidade iha kotuk, depois ema halo uma iha fali oin. Ita husu ba hotu-hotu atu koopera halo uma, kios, karik dook hosi ai-rin eletrisidade nian. Tanba kuandu sirkuiti ruma ita hela besik ne’e mak hetan risku”, nia dehan.
Governante ne’e, dehan populasaun afetadu iha Kuluhun to’o Bekora Fatu-ahi nian hamutuk 180.
Kuluhun to’o Bekora Fatu-ahi, no estrada ne’e nia alargamentu ho nia luan metru 19.
“To’o agora seidauk simu karta lamentasaun hosi populasaun, maibé buat ne’ebé ita haree mak maluk sira-ne’ebé hela iha Kuluhun to’o Bekora, ida-idak sobu mesak nia uma, kios no baraka oan sira. Populasaun sira-ne’e iha ne’e komprende no koopera tebes ho governu”, tenik.
Notísia relevante: SEATOU husu komunidade Becora koopera ho Governu iha planu alargamentu estrada
Jornalista : Osória Marques
Editor : Rita Almeida
