DILI, 10 janeiru 2025 (TATOLI)–Sekretáriu Estadu Asuntu Toponímia no Organizasaun Urbana (SEATOU), Germano Germano Santa Brites Dias, husu ba komunidade suku Becora, postu Administrativu Cristo Rei, munisípiu Dili, atu koopera ho Governu iha planu alargamentu estrada diresaun Kuluhun to’o Fatuahi.
Notísia Relevante: Despeju administrativu: SEATOU apela komunidade Kuluhun hamamuk fatin to’o 09 fevereiru
“Ita husu ba maluk sira atu koopera ho Governu, tanba estrada ne’e ita rasik mak sei uza no goza iha ita-nia rain,” Governante ne’e hateten iha enkontru ho komunidade afetadu iha sede suku Becora, sesta ne’e.
Nia husu ba populasaun sira atu hatama dokumentu sira ba Ministériu Obra Públika (MOP) atu bele fó kompensasaun ba danu sira-ne’ebé Governu identifika ba sira-nia uma sira-ne’ebé atu sobu ne’e.

“Tenke hatama dokumentu ba MOP,” nia apela ba komunidade afetadu, tanba populasaun balun ne’ebé hetan despeza administrativu lamenta ba atuasaun Governu nian ne’e.
Governantes ne’e fó tempu ba populasaun fulan ida atu hamamuk fatin ne’ebé identifika no tau ona markasaun ba planu alargamentu estrade ne’e, hahú husi sesta (10 janeiru 2025) to ó loron 10 fevereiru 2025.
“Iha ne’e, ita fó tempu fulan ida. Ohin (sesta, 10 janeiru) to’o 10 fevereiru, tenke muda fatin, tuir medida ne’ebé Governu foti ona ka indentifika tiha ona,” nia apela.
Tuir dadus Diresaun Estrada Ministeriu Obra Públika nian iha suku Becora, postu administrativu Cristo Rei iha uma kain hamutuk 177 mak sei hetan despeju administrativu iha planu Governu kona-ba alargamentu Estrada ne’e.
Jornalista : Jesuína Xavier
Editór : Cancio Ximenes