DILI, 17 Fevereiru 2025 (TATOLI) – Empreza estatál Murak Rai Timor (MTR) ho nia konsóriu Estrella Resources Limited (ESR) kontinua halo estudu detallu, iha tinan ne’e, hodi define rekursu manganés iha bloku tolu iha munisípiu Lautein.
Prezidente Konsellu Administrasaun no Prezidente Komisaun Ezekutiva MTR, José Manuel Gonçalves, hateten rezultadu husi peskiza ba manganés iha bloku tolu iha Lautein hatudu pozitivu, tanba ein termu kualidade rekursu manganés liuhusi identifikasaun hatudu nia kualidade husi grau médiu to’o aas, tanba haree husi nia persentajen manganés ne’e iha fatuk ida.
“Ida-ne’e rezultadu di’ak tanba ita iha kualidade ne’ebé monu iha médiu no aas ne’e, fásil uitoan atu komersializa kompara ho grau ne’ebé menus. Ami iha esperasan boot atu halo estudu detallu iha tinan ne’e hodi define rekursu no informasaun sufisiente atu ita bele planu ba dezenvolvimentu”, José Manuel Gonçalves informa ba Tatoli iha Timor Plaza.
Nia salienta katak objetivu husi estudu ka serbisu detallu ne’e atu hetan informasaun subterenu nian, katak atu hatene informasaun iha rai-okos hodi justifika katak estensaun ba rai-okos, vertikál, laterál ne’e atu define rekursu sufisiente hodi investe osan hodi dezenvolve.
“Ami hamutuk ho parseiru Estrella bele dehan katak manganés ne’e ita halo deskobrimentu teknikál hatudu di’ak ona no ita sei kontinua halo peskiza detallada, inklui perfurasaun ne’ebé bele akontese iha tinan ida-ne’e”, nia reitera.
Prezidente esklarese objetivu halo prefurasaun ne’e atu define rekursu ne’e nia distribuisaun, nune’e MRT bele prodús relatóriu komersiál ida hodi justifika ba autoridade no Governu katak iha duni rekursu sufisiente atu dezenvolve.
Relembra katak, iha 27 Juñu 2024, empreza Murak Rai Timor ho empreza konsóriu Estrella Resources Limited asina akordu parsosiál ka shareholder agreement ne’ebé halo peskiza ba manganés ba bloku tolu iha Lautein.
Tuir akordu nee, MRT sei serbisu hamutuk ho ESR hodi fó apoiu iha faze prospesaun no peskiza, inklui dezenvolvimentu rekursu manganés iha área konsesaun tolu hanaran ZA001, ZA002 no ZA003 iha Lautein ho rásiu partisipasaun mak 30% ba MRT no 70% ba ESR.
Notísia relevante : https://tatoli.tl/2024/06/27/mrt-e-p-no-esr-asina-akordu-sosiu-halo-peskiza-ba-manganez-iha-lautem/
Jornalista: Arminda Fonseca
Editora: Maria Auxiliadora
