VIKEKE, 17 Fevereiru 2025 (TATOLI)—Prezidente Autoridade Munisípiu (PAM) Vikeke, Francisco Cruz Simões de Gonzaga Soares, husu Ministériu Edukasaun (ME) aselera prosesu konstrusaun edifísiu eskola CAFE munisípiu Vikeke tanba komunidade oferese rai ba Governu.
Notísia Relevante: Governu konstrui edifísiu eskola CAFE iha Lautém no Viqueque
“Rai ba konstrui edifísiu eskola CAFE ita komunidade Caraubalu foin lalais entrega ona ba ha’u. Iha tempu badak, ha’u sei entre rai ne’e ba Ministériu Edukasaun atu hahú halo konstrusaun eskola CAFE, iha rai ne’ebé ita-nia komunidade oferese,” Francisco Cruz Simões de Gonzaga Soares hateten ba jornalista sira iha resintu edifísiu munisípiu Vikeke, ohin.
Líder másimu Vikeke ne’e salienta aselera konstrusaun edifísiu eskola CAFE hodi uza prosesu aprendizajen iha área ne’ebá.
“Tanba uluk ne’e, rai laiha atu halo konstrusaun maibé agora rai iha ona ita aselera konstrusaun hodi ita-nia oan sira bele uza aprendizajen,” nia hateten.
Iha fatin hanesan. Ministra Edukasaun (ME), Dulce de Jesus Soares, hateten agradese ba komunidade Vikeke no komunidade ne’ebé oferese ona rai ba eskola CAFÉ hodi harii eskola tanba iha tinan ida-ne’e ME deside atu konstrui eskola CAFE.
“Tanba orsamentu ne’e prevee ona iha grande projetu kuaze tinan 10 ona maibé ita nunka hetan rai, atu hari’i edifísiu eskola CAFE Vikeke nian. Tan ne’e, ha’u husu parabéns PAM Vikeke ne’ebé hetan ona rai hodi konstrui eskola CAFE. Iha tinan ida-ne’e, ita sei konstrui edifisu eskola CAFE. Kona-ba alokasaun orsamentu ba konstru eskola CAFE, ha’u ladún lembra maibé orsamentu ne’e previstu ona iha grande projetu, nune’e tékniku sira sei prepara Planta no Kadernu Enkargu ka Bill of Quality (BoQ, sigla englés) mak foin ita hatene loloos montante orsamentu ba konstrusaun ne’e,” Governante ne’e hateten.
Antes ne’e, komunidade Caraubalu oferese ba konstrusaun edifísiu eskola CAFE lokaliza iha Betu-Hun ho medida 80 x 150. Komunidade Caraubalu hamutuk ho autoridade suku Caraubalu entrega rai iha loron 06 fulan-Fevereiru 2025 ba Prezidente Autoridade munisípiu Vikeke.
Notísia Relevante: https://tatoli.tl/2025/02/06/abitante-caraubalu-entrega-rai-ba-governu-konstrui-edifisiu-eskola-cafe/
Jornalista : Vitorino Lopes da Costa
Editór : Cancio Ximenes
