DILI, 17 Fevereiru 2025 (TATOLI)–Deputadu Bankada Governu husi Congresso Nacional da Reconstrução Timorense (CNRT), Anacleto Freitas, hato’o preokupasaun populasaun nian kona-ba laiha parteira iha área remota, munisípiu Vikeke, nune’e husu ba Ministériu Saúde (MS) atu tau atensaun.
“Ha’u hakarak foti asuntu saúde iha munisípiu Vikeke, iha Postu Saúde ne’ebé dook husi munisípiu hanesan Uaimori Tula, Matebiaun Hun, no Lua Raikuak iha pesoál saúde iha ne’ebá, so que parteira mak laiha. Tanba ne’e, ita-nia inan-feton sira atu partu sempre halai mai iha Sentru Saúde iha postu no munisípiu,” nia levanta liuhusi reuniaun plenária Parlamentu Nasionál (PN), segunda ne’e.
Nia dehan, Postu Saúde ida dook tebes dalaruma Ambulánsia mós laiha.
Notísia relevante : Komisaun F rekomenda aumenta profisionál saúde iha sentru no postu
Iha sorin seluk, Deputadu Opozisaun husi Kmanek Haburas Unidade Timoroan (KHUNTO), Luís Roberto, levanta kestaun iha área edukasaun, iha Eskola Ensinu Báziku Sentru Lospalos nian falta manorin-na’in ba disiplina matemátika, fízika no biolójia, nune’e husu ba ministériu kompetente atu tau atensaun.
Deputada Bankada Opozisaun husi Frente Revolucionária de Timor-Leste Independente (FRETILIN), Mariquita Soares, fó hanoin ba Ministériu Edukasaun atu aselera implementasaun tuir programa IX Governu Konstituisionál ne’ebé kada tinan sei harii sala aula hamutuk 1.000 iha territóriu, tanba eskola balun iha territóriu ninia kondisaun infraestrutura ladi’ak.
Aleinde ne’e, husu atu kontrola programa merenda eskolár iha territóriu hodi garante kualidade ai-han ba estudante sira no husu atu aselera implementasaun tanba agora tama ona iha fulan-fevereiru.
Deputadu FRETILIN, Antonino Doutel Sarmento, levanta kondisaun estrada ladi’ak iha Soro tun ba Suro Kraik, maski fatin ne’e istóriku iha tempu rezisténsia.
Deputadu CNRT, Natalino dos Santos, foti kestaun estrada iha suku Usukain-Covalima, ne’ebé fatin ne’e importante tebes iha tempu rezisténsia no suku Mape maibé nia kondisaun ladi’ak.
“Ho ida-ne’e presiza hadi’a nune’e populasaun iha ne’ebá bele asesu mai iha munisípiu no postu hodi lori sira-nia produtu lokál mai fa’an,” nia akresenta.
Deputadu dehan, estrada liga bá Likidoe no postu Remexio iha suku Maumeta, Fahisoi, Fadabloko iha munisípiu Aileu potensiál ba saburaka, kafé, ainanas no seluk tan maibé estrada ladi’ak nune’e difikulta komunidade atu lori sira-nia produtu mai fa’an iha merkadu. Nune’e, husu ba Governu liuhusi Ministériu Obras Públika (MOP) atu tau atensaun.
Deputadu Bankada Governu husi Partidu Demokrátiku (PD), Armando Lopes, foti iha munisípiu Lautein iha aldeia Kekeharan to’o agora seidauk asesu ba liña eletrisidade.
Vise-Ministru ba asuntu Parlamentár, Adérito Hugo da Costa, rejista preokupasaun sira ne’e no sei enkamiña ba ministériu tutela hodi tau atensaun.
Jornalista : Nelson de Sousa
Editora : Julia Chatarina
