DILI, 18 Fevereiru 2025 (TATOLI)–Konsellu Kombantente Libertasaun Nasionál (CCLN, sigla portugés) sei lansa fatuk dahuluk ba konstrusaun banku veteranu iha loron 2 fulan-Marsu tinan ne’e.
“Loron 2 Marsu ita halo lansamentu ba fatuk dahuluk iha antigu Dolog Bebonuk”, dehan Prezidente CCLN, Vidal de Jesus Riak Leman, ba TATOLI iha ninian knar fatin, Komoro, tersa ne’e.
Nia hatutan: “Fundu kontributivu kada fulan koa $30 ne’e mak hodi halo fundu veteranu, maibé ba prosesu konstrusaun harii banku ne’e Governu prepara no apoiu millaun $3″.
“Kona-ba fundu veteranu ne’ebé VIII la aprova depois mai iha IX Governu kontinua fali ne’e tanba ita iha jestaun ida ne’ebé uzu ba tempu naruk nian, ne’ebé sei benéfisia ba ita-nia veteranu no ba nia-oan beioan sira tuir mai. Agora ami hetan lisensa provizória hosi Governu”, Riak Leman dehan.
Riak Leman dehan tan rekezitu hosi Banku Sentrál ba harii banku veteranu ne’e mak tenke prepara rai hodi harii banku, rekursu umanu preparadu, tanba ne’e fiar no garante katak fulan ne’e ba oin banku veteranu funsiona.
“Horiseik ami hatama dezeñu no BoQ ba Diretór Diresaun Obras Públika, hein atu implementa ka konstrusaun banku veteranu”, nia dehan.
Fundu Kontributivu Kombatente Libertasaun Nasionál ba tinan 2024 atinje ona milliaun $48.98-resin, ida ne’e la-inklui lukru.
Notísia relevante: Fundu kontributivu 2024 atinje ona milliaun $48.98-resin
Jornalista : Osória Marques
Editora : Rita Almeida
