DILI, 18 Fevereiru 2025 (TATOLI) – Murak Rai Timor, Empreza Públika (MRT, E.P) finaliza ona atividade peskiza minerál metáliku ba bloku haat iha Bobonaro, Kovalima no Likisá.
Prezidente Konsellu Administrasaun no Prezidente Komisaun Ezekutiva MRT, José Manuel Gonçalves, informa katak lokalizasaun ba bloku haat ne’e, tolu mak minerál estratéjiku ne’ebé maioria iha Bobonaru no parte balun tama ba área Kovalima nian. Ba bloku indústria lokaliza iha Likisá, iha postu administrativu Bazartete.
Iha bloku haat ne’e, MRT konsege finaliza serbisu iha terrenu no agora iha prosesu ba halo análize ba amostra lubuk ida ne’ebé rekolla husi serbisu iha terrenu.
“Hanoin fulan-Marsu, tarde liu Abríl tinan ne’e, ami bele finaliza ona relatóriu ida hola parte husi ami-nia kompromisu ba autorizasaun nian atu submete ba Governu, tanba ami-nia autorizasaun ne’e sei termina iha 24 Maiu tinan ne’e”, José Gonçalves dehan ba Tatoli iha Timor Plaza.
Hafoin MRT asegura bloku haat ne’e, nia prosesu administrativu legál lubuk ida ne’ebé tenke kumpri hanesan kódigu mineiru, nomós rekizitu sira ne’ebé autoridade hatuur.
Murak Rai Timor nia prioridade, iha 2024, mak finaliza prosesu estabelesimentu empreza nian hahú husi aspetu legál administrativa, rekursu umanu, infraestrutura no ekipamentu ne’ebé importante atu apoia funsionamentu empreza nian.
Nia esplika katak bainhira estabelesimentu hotu tiha, MRT arranka kedas ba prioridade sira tuirmai mak atu asegura MRT nia área konsensaun sira hahú serbisu balun ne’ebé liga ho knaar importante Murak Rai nian iha atividade mineira.
MRT esforsu hodi halo prosesu administrativu lubuk ida no tékniku nian atu finaliza estudu sira ne’ebé rekolla iha terrenu hodi submete ba autoridade.
“Tinan kotuk ami halo publikasaun ida katak iha bloku haat ne’e hetan rezultadu pozitivu atu bele alkansa ba faze tuirmai ba prospesaun peskiza detallu ne’ebé bele inklui serbisu sira hanesan jeolojia, jeofízika, jeokímika ne’ebé detalladu”, dirijente ne’e dehan.
Nia adianta katak serbisu sira ne’e hotu sei hola parte husi análize ne’ebé MRT halo daudaun no klaru katak ho rezultadu ne’ebé iha, MRT halo dezisaun katak bloku haat ne’e sei la husik ida no kontinua halo peskiza detallu iha 2025 ho objetivu atu define rekursu ka rezerva tantu ba minerál estratéjiku komu minerál indústria nian.
“Ami halo ona deklarasaun katak halo deskobrimentu tékniku ida ba minerál estratéjiku no ita espera katak ho estudu detalladu ne’ebé ami sei halo iha fulan-Maiu tinan ne’e ba oin bele deskobre tan iha forma detallu liu kona-ba rekursu no se ita bele to’o ba iha perfurasaun, bele fó liután serteza kona-ba rezerva. Nune’e, bele ajuda ita define vialibilidade komérsiu husi projetu ne’e”, prezidente ne’e adianta.
Tuir Kódigu Mineiru, durasaun ba atividade prospesaun ne’e tinan sanulu, maibé Murak Rai ho tékniku sira ne’ebé fiar katak bele habadak tempu nune’e redús kustu. “Karik buat hotu la’o di’ak no natureza apoia, ita bele deklara lalais rezultadu husi viabilidade komersiál husi projetu ne’e ho lais”, nia espera.
Notísia relevante: https://tatoli.tl/2024/05/24/anm-emite-lisensa-ba-mrt-halo-peskiza-mineral-metaliku-iha-munisipiu-tolu/
Jornalista: Arminda Fonseca
Editora: Maria Auxiliadora
