ANM emite lisensa ba MRT halo peskiza minerál metáliku iha munisípiu tolu

BOBONARO, 24 maiu 2024 (TATOLI)-Autoridade Nasionál Minerál (ANM), sesta ne’e emite lisensa ambientál no rekoñesimentu ba empreza estatál Murak Rai Timor (MRT) E,P atu halo atividade peskiza minerál metáliku iha munisípiu tolu hanesan; Bobonaro, Covalima no Liquiçá.

Prezidente ANM,EP, Rafael de Araújo, hateten rekoñesimentu ne’e hanesan faze inísiu ida atu halo estudu prelimináriu ne’ebé mak sei determina prosesu boot ida ne’ebé ke sei tuir mai.

Notisia relevante: Empreza husu autorizasaun ANM utiliza materiál projetu konstrusaun Marina Square

“Sira halo estudu to’o iha Suai ne’ebá tanba dook oituan, sira dehan lae extensaun rekursu ne’e halai tan ba Suai no kontinua husi Bobonaro ba tan  Suai, entaun sira bele extende tan, hanesan mós iha Liquiçá, kuandu ida ne’e ita falla, ita lahatene ona rekursu ida-ne’e iha ka lae, ne’e prosesu ki’ik-oan,” nia hateten iha Cruz Vermelha Filial Maliana.

Maibé importante tenke servisu hamutuk tambe rekursu ida-ne’e na’in mak ita hotu.

Nia husu Prezidente Autoridade Munisipál atu hatutan informasaun ba líder komunitária sira hodi bele koopera no kolabora ho empreza MRT,EP nune’e atividade peskiza ne’e bele la’o ho di’ak no susesu.

Prezidente MRT, EP , José Manuel Goncalves, orgulu tanba hetan konfiansa husi governu atu implementa projetu ne’e iha fatin haat hanesan Fahilebo iha munisípiu Liquiçá, Lepo iha munisípiu Covalima no postu administrativu Maliana no suku Ai-Asa, postu administrativu Bobonaro.

Nia fiar katak ba oin sei servisu hamutuk ho Konsellu Veteranu atu fornese informasaun ho kualidade ne’ebé bele prienxe rekizitu no regulamentu ne’ebé hatuur ona iha lei inan.

“Ami haree katak estudu ne’ebé tuir informasaun ami asesu, hatudu katak iha ita-nia munisípiu tolu ne’e iha informasaun ba prienxe minerál sira ne’e tanba ne’e mak motiva ami atu foti pasu ida ho autoridade, atubele hahú halo estudu inísiu,” nia hateten.

Empreza estatál ne’e iha vontade ba halo estudu ne’e hodi bele atinje objetivu estratéjiku kurtu no médiu prazu kona-ba atu halo dezenvolvimentu explorasaun rekursu ninerál iha Timor-Leste.

MRT, EP hakarak investe tempu ba setór ne’e tanba  haree katak Timor-Leste nia balansu fonte enerjia ba oin sei depende maka’as ba explorasaun rekursu minerál.

“Ita agora tama hela ba iha faze tranzisaun, faze ida-ne’ebé mundu atu muda fonte enerjia husi enjerjía sira ne’ebé emite karbonu maka’as ba emite karbonu zero,” nia hateten.

Sekretáriu Autoridade munisipál Bobonaro ba Asuntu Sosiál, Júlio Carvalho Caero, konsidera tividade ne’e importante tebes nune’e ba futuru  rekursu minerál no metálika sira  iha nunisípiu Bobonaro bele  ona halo explorasaun.

“Ami Bobonaro iha rikusoin minerál, ita haree maran hela mas iha laran buat barak mak iha, diamon, emas no gás,” nia dehan.

Prezidente Autoridade Munísipiu Covalima, Miguel Armanda Cardoso, konsidera atividade peskiza ne’e importante tebes tanba rekursu minerál no metáliku sira ema haree hanesan buat la vale.

Prezidente Autoridade Munísipiu Liquiçá, Paulino Ribeiro, prontu fó apoia másimu ba ekipa MRT tanba Liquiçá mós iha poténsia ba rekursu minerál no metálika.

Tarjetu ba peskiza ne’e iha munisípiu Bobonaro no Covalima fokus liu ba  minerál terras raras, baze no precious metal no iha Liquiçá, Fahilebo kaolin.

Enkuantu fatin sira-ne’ebé indika atu halo peskiza mak hanesan iha postu administrativu Maliana, hahú husi Ritabou, Raifun, Holsa, Tapo-Memo, Saburai.

Husi parte postu administrativu Bobonaro, Ai-Asa, Oe-leu, Mali-lait, Sibuni, Atuaben, Lourba, Lour, Kota-Bo’ot,Kolimau.

Parte Munísipiu Covalima mak hanssan Lepo no Zumulai. Munísipiu Liquiçá iha postu administrativu Bazartete mak iha suku Fahilebo, Ulmera no Leorema.

Notísia relevante: Xanana lansa atribuisaun lisensa prospesaun no peskiza ba mineiru metáliku iha Lautem  
Jornalista: Sérgio da Cruz
Editór: Evaristo Soares Martins