DILI, 18 Fevereiru 2025 (TATOLI)-Prezidente Interinu Autoridade Munisípiu Dili, António Augusto Guterres, konsidera kestaun lixu iha kapitál hanesan asuntu ne’ebé komplexu. Tanba ne’e, parte AMD halo ona orientasaun ba kamioneta sira ne’ebé raut foer tenke moos.
“Lixu iha kapitál kada loron aumenta, tanba Dili kompleksidade ba lixu. Maibé ita kontinua aumenta ho saneamentu ne’ebé ita rekruta daudaun ne’e hodi hamoos no raut”, dehan nia ba TATOLI iha Kolmera, tersa ne’e.
Nia hatutan tan: “Jestaun lixu iha rua mak manualmente no karreta modernu ne’ebé la’o hela. Ita nafatin mellora jestaun lixu iha kapitál Dili”.
“Kona-ba kamioneta rekolla lixu daudaun ne’e loron ida foti dala tolu maibé futuru ita halo jestaun no fatin ne’ebé nia foti ne’e tenke to’o moos. Tanba ita-nia observasaun dala ruma ret tolu de’it ne’e, ita haree fatin lixeiru sei iha lixu”, dehan tan.
AMD define no planeia sei tau plat no númeru motorista husi kompañia nian ne’ebé kobre zona sira iha Dili, nune’e fasil kontrola.
Xefe Departamentu Servisu Saneamentu iha Autoridade Munisípiu Dili, Domingos do Santos Soriano, hateten fulan ida kamioneta 50 rekolla lixu ho tonelada 4869.
Kamioneta neen mak destaka iha postu administrativu Kristu Rei, 10 iha Nain-Feto, 11 iha Vera-Krus, 23 iha Don Aleixo.
Notísia relevante: Fulan ida kamioneta 50 rekolla lixu tonelada 4869
Jornalista : Osória Marques
Editora : Rita Almeida
