DILI, 10 Fevereiru 2025 (TATOLI)-Xefe Departamentu Servisu Saneamentu iha Autoridade Munisípiu Dili, Domingos do Santos Soriano, hateten fulan ida kamioneta 50 rekolla lixu ho tonelada 4869.
“Tuir ita-nia kontratu ho kompañia ne’e katak loron ida kada kamioneta foti dala tolu. Maibé kuandu kamioneta tula la másimu mak labele halo redasaun ba lixu, ita haree iha Dili dalabarak Postu Administrativu Don Aleixo mak prodús lixu barak liu”, nia dehan iha nia knaar fatin Matadouro, segunda ne’e.
Nia dehan daudaun ne’e kamioneta neen mak destaka iha postu administrativu Kristu Rei, 10 iha Nain-Feto, 11 iha Vera-Krus, 23 iha Don Aleixo.
Sekretáriu Estadu Asuntu Toponimia no Organizasaun Urbana (SEATOU), Germano Santa Brites, hatete durante ne’e kompañia ne’ebé tula lixu koopera ho SEATOU hodi kontrola no rekolla lixu ida sidade Dili.
“Ita halo kontrolu ba lixu durante fulan ida ho balun ne’e la’o di’ak ho 75%. Tanba, kompañia sira koopera ho ita di’ak tebes, maibé iha kamioneta 10 liu mak ita haruka fila tanba tula de’it ai-tahan ba soe entaun ita haruka fila no ita haruka ense halo nakonu mak foin tula ba Tibar. Ho ida-ne’e mak bele evita lixu”, SEATOU hateten.
Kona-ba tula tonelada ne’e, SEATOU hatán, kontinua de’it ho regra servisu Autoridade Munisípiu Dili nian ne’ebé loron ida kada kamioneta tula dala tolu.
“Ita halo kontinuasaun, ministériu halo tuir loron ida tula dala tolu. Sira tenke hakas-aan tula, maske iha nia área (lokasi) mak tula hotu ona maibé sira buka tenke loron ida tula dala tolu. Se nakonu lalika ba tanba ha’u tau ekipa ida iha Tibar hodi haree, kuandu la nakonu haruka fila. Lixu ne’e buat kiik-oan ida maibé sai problema boot iha sidade Dili”, nia dehan.
Kompañia tolu ne’ebé Governu kontratu mak hanesan Kompañia GSA, Nelces no Labilay.
Notísia relevante: Empreza Labilay iha kamioneta 26 rekolla lixu iha kapitál
Jornalista : Osória Marques
Editora : Rita Almeida
