DILI, 18 Fevereiru 2025 (TATOLI)— Embaixadora Xina iha Timor-Leste, Wang Wenli, hasoru malu ho Ministru Komérsiu no Indústria, Filipus Nino Pereira, hodi ko’alia kona-ba Xina nia vontande atu apoia Timor-Leste iha área komérsiu nian.
Ministru Komérsiu no Indústria, Filipus Nino Pereira, hateten objetivu husi enkontru ne’e, tanba iha loron hirak liubá Timor-Leste nia aviaun Aero Dili hahú halo ona vou direta bá Xiamen, entaun Governu Xina hakarak kontinua apoia Timor-Leste, liuliu iha atividade komérsiu nian entre país rua.
“Ita hatene merkadu Xina ne’e boot tebes no rota foun ne’ebé ita halo ne’e hanesan oportunidade negósiu di’ak ida ba ita oinsá aumenta ita-nia komérsiu ho Xina, tanba durante ne’e, ita-nia produtu ki’ik balun hanesan kafé, maek esporta ona bá Xina. Agora, ita buka oinsá halo esplorasaun ba produtu sira seluk inklui produtu tasi nian hanesan boek no kadiuk”, Nino Pereira hateten, ohin.
Nia esplika katak liuhusi enkontru ne’e, Embaixadora Wang Wenli mós hato’o referénsia lubuk ida kona-ba oinsá atu apoia Timor-Leste iha atividade komérsiu nian.
“Ita mós husu ba Xina, bá oin bele iha kooperasaun ne’ebé di’ak liután, liuliu presiza karta formál ida husi sira hodi identifika produtu potensiál Timor-Leste nian ne’ebé bele halo esportasaun bá iha merkadu Xina”, dehan.
Nia salienta antes Timor-Leste nia produtu sira halo esportasaun, Ministériu Komérsiu halo koordenasaun ho Embaixadora Xina iha Timor-Leste hodi ko’alia téknikamente produtu Timor-Leste nian ba oin bele tama iha merkadu Xina nian no bele tuir padraun operasaun komérsiu no prienxe rekizitu husi parte Alfándega Xina nian.
“Ita-nia preprasaun ba produtu kuaze item 10-resin mak kafé, maek, boek no seluk, tanba tuir planu, ita sei iha mós edifísiu ba promosaun produtu Timor-Leste nian iha Makau, Hong Kong. Ita mós sei prepara tan lista ba iha embaixada Xina nian atu haree produtu potensiál sira ne’ebé iha”, governante ne’e realsa.
Membru Governu ne’e dehan esforsu ne’ebé MKI sei halo ba oin mak ko’alia ho ministériu relevante sira, liuliu Ministériu Agrikultura Pekuária, Peska no Floresta bainhira akontese esportasaun ba produtu sira ne’e maka nafatin garante ba nia sustentabilidade.
Iha sorin seluk, Embaixadora Xina iha Timor-Leste, Wang Wenli, hateten diskusaun ne’ebé halo ne’e kontinuasaun hafoin lansa rota diretamente Aero Dili bá Xina. “Nune’e enkontru ne’e oinsá esplora potensialidade komérsiu entre nasaun rua, tanba Xina no Timor Leste hanesan país amigu, sei aplika zero taxa ba produtu hotu hotu husi Timor-Leste ba merkadu Xina”, Wang Wenli hateten.
Iha sorumutu ne’e ko’alia mós prosedimentu no jestaun ba kualidade produtu Timor-Leste nian, tanba Xina hakarak simu produtu barak liután bazeia ba merkadu Xina, liuliu kafé, maek no seluk tan.
“Ami sei kontinua apoia Governu Timor Leste no kompañia Xina sira atu halo haluan kooperasaun sira”, nia dehan.
Notísia relevante: Prezidente Xina hato’o kompromisu kontinua apoia dezenvolvimentu Timor-Leste
Jornalista: Arminda Fonseca
Editora: Maria Auxiliadora
