DILI, 19 fevereiru 2025 (TATOLI)-Bankada Governu husi Partidu Demokrátiku (PD) iha Parlamentu Nasionál (PN), propoin Benevides Correia Barros, ba Konsellu Imprensa (CI, sigla portugés).
“Husi Konsellu Imprensa ba bankada PD iha proponente nia ema ida ba área jurídiku, ami propoin Benevides, karta hato’o ona ba sekretária meza Parlamentu Nasionál”, Xefe bankada PD, Manuel Noronha, informa iha resintu PN, kuarta ne’e.
Notísia relevante: Expedito Dias Ximenes-Benevides Correia reprezenta PN ba CI
Nia hateten, bankada propoin atuál Konselleiru Benevides ba CI, tanba durante ne’e nia mak asume hela knaar ida ne’e ba área jurídiku, nune’e bankada hanoin kontinua propoin kandidatu ne’e tanba haree ema ne’ebé daudaun hala’o hela knaar, iha ona esperíensia no di’ak liu kontinua.
Iha fatin hanesan, Xefe Bankada Kongresu Nasionál Rekonstrusaun Timorense (CNRT, sigla portugés), Duarte Nunes, hateten bankada Governu CNRT ho PD aprezenta ona kandidatu ho pakote lista ida haruka ona ba meza PN, kandidatu ba área jurídiku husi PD no mídia nian mak husi CNRT.
“Maibé, sei iha mudansa fali husi bankada, CNRT sei retira fali kandaditu ida husi CNRT nian ne’ebé submete ona, subtitui fali kandidatu seluk, tanba iha pedidu halo revizaun, nune’e iha reuniaun líder bankada aban sei hato’o”, tenik.
Tuir nia, kandidatu ne’ebé bankada propoin ema iha esperíensia iha área mídia.
Xefe Bankada opozisaun husi Kmanek Haburas Unidade Nasionál Timoroan (KHUNTO), Antonio Verdial de Sousa, dehan bankada kiik nune’e sei laiha kandidatu.
Liuhusi plenária iha 10 Fevereiru 2025, PN anúnsiu prosesu aprezentasaun kandidatura ba eleisaun husi PN ba membru na’in-rua ba KI.
Tuir ajenda iha 24 Fevereiru PN sei realiza eleisaun hili reprezentante PN ba KI. Tanba, tuir Lei Komunikasaun Sosiál, PN tenke hili ema na’in-rua ne’ebé méritu iha komunikasaun sosiál no ema ida nu’udar jurista ne’ebé ninia esperíensia iha área jurídiku nian.
Tuir Lei Komunikasaun Sosiál númeru 5/2014, 19 Novembru, iha artigu 45 kona-ba kompozisaun KI hamutuk membru na’in-lima ne’ebé atu hili liuhusi dalan:
a) Reprezentante jornalista na’in-rua ne’ebé sira hili tiha ona liuhusi eleisaun;
- b) Reprezentante órgaun komunikasaun sosiál ida, ne’ebé órgaun sira hili tiha ona liuhusi eleisaun;
- c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili;
- d) Membru sira KI hili entre sira-nia prezidente.
Artigu 46 ne’ebé ko’alia kona-ba mandatu membru KI nian iha durasaun tinan haat, ne’ebé sei bele renova dala ida de’it.
Entretantu, liuhusi konferénsia konjunta parte husi parte asosiasaun jornalista hanesan Timor-Leste Press Union (TLPU), Assosiasaun Jornalista Timor-Leste (AJTL) no Uniaun Profisionál Jornalista Timor-Leste (UPJTL), ne’ebé KI realiza tinan kotuk, hili ona reprezentasaun jornalista ba periódu 2025-2029 mak hanesan Joaquim Coutinho no Cesar Mali, reprezentante mídia-na’in mak Suzana Cardoso.
Notísia relevante: Bankada CNRT no PD propoin kandidatu na’in-rua ba Conselho de Imprensa
Jornalista : Nelson de Sousa
Editora : Rita Almeida
