INFPM Rejionál Baukau garante distribuisaun ai-moruk ba farmásia
BAUKAU, 19 Fevereiru (2025)—Institutu Nasionál Farmásia no Produtu Medikamentu (INFPM) liuhosi Unidade Armazein Rejionál Wewe Baukau garante prosesu distribusaun ai-moruk no ekipamentu médiku ba farmásia iha munisípiu haat.
Xefe Unidade Armazein Rejionál Wewe Baukau, Adelino Espírito Santo, esplika prosesu distribusaun ai-moruk no ekipamentu médiku bazeia ba pedidu no relatóriu kada fulan ne’ebé hato’o direta bá nasionál no bainhira aprova ona iha rejionál sei distribui bazeia ba responsabilidade.
“Armazein Rejionál sempre asegura prosesu distribusaun ai-moruk no ekipamentu médiku ba farmásia haat no ospitál hodi garante atendimentu saúde ba komunidade,” Xefe Unidade Armazein Rejionál Wewe Baukau informa ba TATOLI iha ninia kna’ar fatin, Vila Nova, Baukau, kuarta ne’e.
Adelino salienta katak prosesu hotu kona-ba distribusaun ai-moruk no ekipamentu médiku sira sei hala’o bainhira farmásia no ospitál hato’o pedidu liuhosi sistema no sei aprova husi INFPM nasionál.
Notísia relevante: 2025-INFPM aloka ona millaun $13 ba sosa medikamentu
Unidade Armazein Rejionál iha responsabilidade atu distribui ai-moruk no ekipamentu médiku to’o iha farmásia sira ne’ebé estabelesida iha munisípiu haat inklui Ospitál Rejionál Eduardo Ximenes (HoREX-sigla bortugés) Baukau bazeia ba pedidu no aprovasaun husi nasionál.
“Distribuisaun la’o normál maibé impaktu ida mak dalaruma pedidu ne’ebé hato’o la disiplina liuhosi sistema entaun aprovasaun bele tarde, tanba sistema online rede ladi’ak bele fó impaktu,” Adelino haktuir.
Tuir dadus, durante fulan-Janeiru 2025, Unidade Armazein Rejionál Wewe Baukau rejista totál ai-moruk hamutuk item 116 ne’ebé stoke disponível hamutuk item 92 ka pursentu 79 no stoke sai (out) hamutuk item 24 korresponde ba pursentu 21.
Enkuantu, medikamentu hamutuk item 338 husi kategoria stoke ne’ebé disponível hamutuk item 292 korrespondente ba pursentu 86 no stoke out pursentu 14 husi item 46.
Produtu medikamentu kategoria tolu hanesan vitál, nesesáriu no esensiál ne’ebé tuir dadus hamutuk kategoria produtu médiku 11 ho totál item 568 ne’ebé stoke disponível hamutuk item 438 korresponde ba pursentu 77 no stoke out pursentu 23 husi item 131.
Unidade Armazein Rejionál Wewe Baukau responsabiliza distribusaun ai-moruk no ekipamentu médiku ba farmásia hamutuk haat iha munisípiu haat hanesan Lautein, Vikeke, Manatutu no Baukau inklui ospitál ida mak HoREX.
Jornalista: Natalino Belo
Editór: Xisto Freitas da Piedade
