DILI, 19 Fevereiru 2025 (TATOLI)-Ministériu Asuntu Kombatente Libertasaun Nasionál (MAKLN), simu ona reklamasaun husi munisípiu-11 ba lista editál kombatente tinan 2009.
Husi númeru ne’e Konsellu Kombatente Munisípiu Aileu iha 520, Ainaru 1028, Baukau 1500, Bobonaru 512, Kovalima seidauk submete, Dili iha 700, Ermera mós seidauk, Lautein 961, Likisá 174, Manatutu 585, Manufahi 735, Oekusi 146 no Vikeke iha 244. Alende ne’e reklamasaun husi Despaisu Ministru no Prezidente Konsellu Kombatente Libertasaun nasionál (CCLN), 895.
Dadus hirak ne’e seidauk finál, tanba foin prazu loron 30. “Foin mak iha loron 30, bainhira keixa tama hotu mak foin bele fó sai, maibé parte téknika sira halo hela servisu, nune’e aban bainrua fó sai públiku ho dadus definitivu”, dehan Ministru MAKLN, Gil da Costa Monteiro Oan Soru, iha Palásiu Governu, ohin.
Munisípiu Kovalima ho Ermera mak seidauk tama, ne’ebé hein de’it bainhira tama hotu mak foin tékniku sira bele haree.
Ministru hatutan totál kombatente libertasaun ne’ebé rejistadu hamutuk 124.782, ida-ne’e iha segundu rejístu 2009 nian, ne’ebé valida mak 10249.
Notísia relevante: Governu taka sai ona lista validasaun kombatente libertasaun hamutuk 92.591
Jornalista : Osória Marques
Editora : Rita Almeida
