Nelson Maria nomeadu ba Fiskál Úniku Imprensa Nasionál Timor-Leste, I.P
DILI, 19 Fevereiru 2025 (TATOLI)-Governu nomeia, ohin, Nelson Maria dos Santos Menezes nu’udar Fiskál Úniku ba Imprensa Nasionál Timor-Leste, Institutu Públiku (INTL, I.P).
Ministru Prezidénsia Konsellu Ministrus, Agio Pereira, hateten proposta nomeiasaun ne’e nia rasik aprezenta tanba Nelson Maria dos Santos antes ne’e hanesan Diretór Finansa iha Prezidénsia Konsellu Ministru.
“Imprensa Nasionál Timor-Leste, Institutu Públiku rasik tutela ba PCM, nune’e ha’u rasik aprezenta proposta ne’e iha semana kotuk aprova ona prezidente atuál ne’e kontinua mandatu. Sesta agora sei fó pose ba elementu sira ne’e hodi hala’o sira-nia serbisu”, Agio Pereira hateten hafoin reuniaun Konsellu Ministru, iha Palásiu Governu, ohin.
Nia esplika katak nomeia Nelson Maria sai fiskál úniku ba INTL tanba konsidera ninia kompeténsia téknika no aptidaun ne’ebé rekoñesidu hodi ezerse knaar, ne’ebé hala’o tuir rejime komisaun servisu, ba períodu tinan haat ho tempu-parsiál.
Lembra katak, iha 22 Janeiru ne’e, Governu renova ona mandatu Jaime Fernando dos Mártires Carvalho Correia nu’udar Prezidente Konsellu Diretivu Imprensa Nasionál Timor-Leste, I.P nian ba períodu tinan haat.
“Desizaun ne’e bazeia ba kapasidade téknika, esperiénsia no kompeténsia komprovada ne’ebé hatudu ona iha jestaun entidade ida-ne’e nian, hodi rekoñese katak kontinuidade iha dezempeñu funsaun sira sei garante izensaun, imparsialidade no idoneidade sira ne’ebé presiza”, refere nota husi Governu ne’ebé Tatoli asesu foin lalais ne’e.
Notísia relevante: Governu renova mandatu Prezidente Konsellu Diretivu INTL, I.P
Jornalista: Arminda Fonseca
Editora: Maria Auxiliadora
