KOVALIMA, 18 fevereiru 2025 (TATOLI)– Ekipa Departamentu Investigasaun Kriminál Nasionál (DIKN) ne’ebé lidera hosi Xefe Dirasaun investigasaun kriminál nasionál (DKIN), Superintendente Polísia João Belo, kuarta-ne’e, halo buska domisiliáriu patrimóniu ba FDS, iha nia rezidénsia, Suku Debos, Aldeia Asumaten, Postu adminstrativu Suai, Munisípiu Kovalima.
Polísia Nasionál Timor-Leste (PNTL) liuhusi Departamentu investigasaun kriminál nasionál ezekuta mandadu husi Tribunál Judisiaria Primeira Instánsia Suai ho Númeru úniku kriminál 0037/25/PNSIC hodi halo buska domisiliáriu patrimóniu suspeitu inisiál FDS.
DIKN halo buska domisiliária no halo apreensaun ne’e akompañadu hosi PNTL munisípiu Kovalima ba suspeitu FDS nia rezidénsia, durante oras tolu; hahú tuku 8:00 remata 10:00.
Iha FDS nia rezidénsia objetu ne’ebé rekolla no halo apriensaun mak mak hanesan karreta privadu marka kijang Inova ho xapa mátrikula A 15128, tais 42 kompostu husi tais mane 28 no feto 14, osan-mean, konta Bankaria BNCTL tolu no osan $70.
Hafoin finaliza halo buska no halo apreensaun suspeitu inisiál FDS mai iha komandu PNTL Kovalima hodi halo justifikasaun kona-ba objetu ne’ebé halo apreensaun iha komandu PNTL Kovalima.
“Bazeia ba mandadu buska no apreensaun hato’o ba iha DIKN loron 1 fevereiru ne’e, ohin ezekuta mandadu hamutuk ho investigasaun munisípiu Kovalima iha FDS nia rezidénsia hodi halo apreensaun objetu sira ita prende no ita valida hodi aprezanta ba Ministériu Públiku”’ Xefe dirasaun investigasaun kriminál nasionál (DKIN), Superintendente Polísia, João Belo hato’o ba jornalista sira iha Komandu PNTL Kovalima, ohin.
Durante halo buska no apreensaun DIKN akuza suspeitu ho krime burla, subornu no seluktan.
“Kona-ba objetivu ne’ebé mak rekolla ha’u labele fó sai tanba ida-ne’e segredu husi justisa ohin ita-boot sira (jornalista) haree rasik”, nia esplika.
Identifika kilat musan ho magazen lima
Aleinde kumpri mandadu buska no apreensaun, identifika tan fora husi mandadu mak objetu seluk kilat musan tan ne’e sei aprezenta ba komandu jerál hodi foti medida hein orientasaun husi Komandu.
“Ami konsidera viola ami-nia regra, sei submete ba regulamentu disiplinár kilat musan ho magazen hamutuk lima Ita hetan ligasaun ba PNTL ho munisoens hamutuk 72” nia haktuir
Suspeitu FDS hanesan membru ativa PNTL nu’udar Ajente xefe ne’ebé husu lisensa la ho saláriu hahú 2015.
“Bazeia ami-nia regra lisensa la ho vensimentu durante tinan tolu halo renova fali maibé FDS renova iha 2018 sa’e mai seidauk iha”, nia dehan.
Jornalista: Celestina Teles
Editór: Rafael Ximenes de A. Belo
