Komisaun B ho Embaixadora Donna Ann diskute apoia EUA ba Timor-Leste
DILI, 20 Fevereiru 2025 (TATOLI) – Komisaun B iha Parlamentu Nasionál (PN) ne’ebé trata asuntu Negósiu, Estranjeiru, Defeza no Seguransa, kinta ne’e, hala’o enkontru ho Embaixadora Estadu Unida Amérika iha Timor-Leste, Donna Ann Welton.
“Enkontru komisaun hala’o ho Embaixadora Estadu Unida Amérika, ne’e bazea ba pedidu husi Embaixadora rasik, ho objetivu primeiru mak Estadu Unidu Amérika liuhusi Embaixadora iha Timor-Leste atu partilla informasaun kona-ba ajudu ne’ebé Amérika halo liuhusi área oinoin iha ita-nia rai, ne’ebé balun la’o tiha ona no balun la’o hela,’’ Prezidente Komisaun B, Augusto Domingos ‘Deker’, hateten ba jornalista sira hafoin sorumutu iha sala komisaun iha PN.
Nia dehan, objetivu daruak husi enkontru ne’e mak ko’alia bazea ba polítika husi Prezidente EUA foun ne’ebé ita rona katak, sei halo mudansa ba polítika kooperasaun ho rai seluk iha kooperasaun área bilaterál ne’ebé halo ita preokupadu oituan.
“Maibé, Embaixadora rasik hato’o katak, Estadu Unidu Ameérika ninia apoiu ba Timor-Leste ne’e mantein nafatin, no informa mós polítika foun ne’e agora iha prosesu nia laran, rezultadu oinsá ikus mai Embaixadora sei update fali ba ita liuhusi komisaun B Parlamentu Nasionál,’’ nia akresenta.
Notísia relevante: https://tatoli.tl/2025/02/19/embaixadora-eua-usaid-iha-timor-leste-seidauk-taka/
Durante sorumutu, Embaixadora rekomenda ba PN no hanesan reprezentante povu iha rai ida-ne’e atu asume responsabilidade hodi halo akompañamentu no fiskaliza programa hotu ne’ebé Amérika apoiu mai ita-nia rai iha área oinoin hanesan iha defeza ho seguransa, agrikultura, edukasaun no seluk tan.
Durante enkontru, parte Komisaun ne’ebé trata asuntu Defeza, Seguransa no Negósiu Estranjeiru husu ba Estadu Unida Amérika tenke konsiente katak, Timor-Leste hanesan nasaun joven hein nafatin apoia hotu EUA nian ba Timor ninia dezenvolvimentu.
Jornalista: Nelson de Sousa
Editór: Evaristo Soares Martins
