DILI, 20 Fevereiru 2024 (TATOLI) – Ministériu Agrikultura Pekuária, Peska no Floresta (MAPPF) disponibiliza motorizada 30 no rádiu komunikasaun 30 ba guarda-floresta no xefe delegasaun floresta territoriál sira husi munisípiu.
Ministru Agrikultura, Pekuária, Peska no Floresta, Marcos da Cruz, hateten distribuisaun motorizada no rádiu komunikasaun ba guarda-floresta no xefe delegasaun floresta sira ne’e atu fasilita sira-nia serbisu iha terrenu hodi kontrola komunidade labele tesi arbiru ai-horis sira kontrola basia idrográfika iha Tono-Oekusi, Raumoko-Lautein, Bee-Lulik-Kovalima no Ainaru.
“Tanba ita klasifika ba rai protejida hanesan iha Lautein, parke Nino Konis Santana, Kablaki ne’ebé define sei sai parke nasionál Kay Rala, inklui fatin seluk hanesan Ramelau no seluk tan ita presiza proteje”, Marcos da Cruz hateten iha Comoro, ohin.
Governante ne’e adianta katak Banku Mundiál apoia rihun $82 ba MAPPF hodi sosa rádiu komunikasaun no motorizada sira ne’e.
Iha fatin hanesan, Sekretáriu Estadu Floresta, Fernandino Viera, husu ba guarda-floresta sira atu uza ho kuidadu motór no rádiu komunikasaun ba serbisu ministériu nian.
“Ekipamentu sira ajuda ita atu asegura rekursu naturál sira, nune’e tenke uza ho efetivu no efisiente. Ita tenke iha sentimentu katak bainhira uza patrimóniu Estadu nian ho kuidadu”, nia husu.
Tuir governante ne’e, ai-laran sira iha Timor-Leste daudaun komesa redús ona nia ai-horis, tanba ne’e presiza tau-matan di’ak liután, nune’e komunidade labele kontinua estraga.
Guarda-floresta husi Ermera Carlos Soares hateten difikuldade ne’ebé durante ne’e sira hasoru mak laiha transporte atu sira tun bá terrenu hodi halo seguransa iha ai-laran sira no laiha rádiu ba halo komunikasaun.
“Maibé, ohin ita simu ona motór no rádiu, ida-ne’e sei fasilita ami-nia serbisu iha terrenu tanba distánsia husi fatin ida bá fatin ida dook”, nia dehan.
Notísia relevante: Servisu guarda florestál falta transporte atu halo patrullamentu
Jornalista: Arminda Fonseca
Editora: Maria Auxiliadora
