KOVALIMA, 20 fevereiru 2025 (TATOLI) – Ministru Komérsiu Indústria (MCI), Filipos Nino Perreira ho nia ekipa akompaña hosi komandante PNTL Munisípiu Kovalima Superintendente Inacio Amaral observa direta kondisaun merkadu, iha fronteira Mota Masin, Postu administrativu Tilomar, munisípiu Kovalima.
Hafoin observa kondisaun merkadu iha Fronteira, Ministru Komérsiu Indústria, Filipos Nino Perreira relata katak, bazeia informasaun ne’ebé nia parte simu merkadu iha fronteira Mota masin la funsiona maibé merkadu fronteira Indonézia mak funsiona iha loron segunda.
“Ha’u simu informasaun, atividade merkadu iha fronteira iha Indonézia mak la’o, iha loron segunda maibé ita-nia merkadu iha fronteira la reativa. Ita haree posibilidade oinsá merkadu fronteira Mota Masin bele reativa ”, Filipos Nino Perreira , hato’o ba jornalista sira, iha fronteira Mota masin, ohin.
Governante ne’e observa no nota katak kondisaun merkadu iha fronteira Mota masin seidauk favorese, tanba pesoál balun uza konstrusaun merkadu Mota masin sai hela fatin , tanba ne’e presiza atu halo koordenasaun ho Ministériu Saúde no PNTL.
Ho nune’e atu reativa merkadu iha fronteira Mota Masin presiza halo estudu ne’ebé di’ak hodi fó oportunidade ba setór privadu sira bele aproveita atu haree movimentu ekonomia iha pontu entrada Mota masin Tilomar.
“Merkadu Fronteira ba futuru ita sei halo estudu ne’ebé di’ak ho kle’an; bele haree nia impaktu ekonómiku, bainhira ita funsiona fali merkadu ba interrese ekonomia. Importante fó oportunidade ba setór privadu sira atu haree movimentu ekonomia”, nia informa.
Tan tuir governante ne’e, Governu sei ko’alia ho setór privadu sira nune’e sira bele aproveita, molok organiza atividade iha merkadu iha fronteira Mota ain no Mota Masin iha Tilomar, la haree nesesidade ikusmai merkadu iha fronteira la funsiona.
“Presiza atu haree oinsá mak halo estudu impaktu ekonómiku bainhira viavel, hafoin ita bele reativa hodi define mós tipu atividade nune’e bele atrai setór privadu no komunidade sira ne’ebé uza fatin referidu”, nia fo hanoin.
Merkadu Fronteira la funsiona tinan naruk ona hahú iha tempu IV konstituisionál ho intensaun atu fasilita atividade ekonómiku iha fronteira. Governu fasilita prepara kondisaun maibé komunidade ho setór privadu mak ladun aproveita ho fasilidade ne’ebé iha.
Bazeia ba ajenda ne’ebé TATOLI asesu, durante prezensa Ministru Komérsiu no Indústria ho nia ekipa, iha 21 fevereiru, vizita mós funsionáriu komérsiu no indústria, merkadu Mota Masin no mós produsaun rotan iha Suku Ogues, Postu Maucatar.
Tuir planu, iha loron 20 fevereiru ne’e, Ministru Komérsiu no Indústria (MCI) sei hala’o enkontru ho Prezidente Autoridade (PAM) Kovalima no halo mós vizita ba merkadu sira iha munisípiu Kovalima.
Jornalista:Celestina Teles
Editór :Rafael Ximenes de A. Belo
