DILI, 21 Fevereiru 2024 (TATOLI) – Diresaun Nasionál Transporte no Terrestre (DNTT), Ministériu Transaporte no Komunikasaun, rejista importasaun motór elétrika 144 durante tinan kotuk.
“Tinan ne’e, kompañia balun mai husu atu hatama tán, maibé ita la autoriza ona. Haruka sira hatama pedidu ba Ministériu Transporte no Komunikasaun [hodi] hetan autorizasaun mak ami autoriza hatama, maibé la’e ami la autoriza ona”, Xefe Departamentu Veíkulu, Marcelina Dias Peloi, informa ba Tatoli, ohin.
Nia esplika razaun DNTT la autoriza ona importasaun motór elétrika ne’e, tanba ekipamentu ida ajuda sira atu karrega motór ne’e laiha.
Iha sorin seluk, Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, hateten motór elétrika ne’ebé daudaun sirkula iha Timór ne’e iha tipu rua, ida boot no seluk ki’ik.
“Boot nia modelu hanesan motór, naran mak hanesan Honda PCX Electric, Gesits, Viar Q1, Selis E. Max, United, serta EC-GO no seluk tan. Ida-ne’e DNTT autoriza tanba nia motór boot no kódigu estrada fó dalan. Maibé, ida ki’ik hanesan bisikleta naran Skeleton, motór Listrik trex no seluk tan ne’e ita la autoriza no la rejistu iha Diresaun Nasionál Transporte no Terrestre”, Nelson Martins adianta.
Nia salienta motór elétrika boot ne’e bele halo movimentu iha estrada boot, maibé ki’ik sira ne’e labele no tenke halai iha bairru laran. “Ida-ne’e loloos Polísia Tránzitu mós tenke haree hotu ba asuntu ne’e”, nia hato’o.
Notísia relevante: DNTT seidauk rejista motór elétrika ki’ik sira sirkula iha Dili
Jornalista: Arminda Fonseca
Editora: Maria Auxiliadora
