DILI, 21 Fevereiru 2025 (TATOLI) – Diretór Nasionál Infraestrutura no Komunikasaun iha Ministériu Transporte no Komunikasaun (MTK), Ambrósio Amaral, informa katak teste ba kabu submarinu fiba ótika ligasaun internasionál iha Cable Landing Station (CLS) Bebonuk seidauk bele realiza iha Fevereiru ne’e.
Ambrósio Amaral esplika katak, tuir planu Governu no empreza Alcatel Submarine Networks (ASN) halo trial ka teste ba kabu iha fulan ne’e, maibé labele akontese bainhira empreza ne’ebé atu jere CLS ne’e seidauk iha no Primeiru-Ministru, Xanana Gusmão, mós hakarak haree didi’ak empreza ne’ebé atu jere ne’e tenke iha koñesimentu di’ak kona-ba área ne’e.
Diretór ne’e salienta katak estabelesimentu empreza ne’ebé atu jere ne’e nia esbosu lei no estatutu sira finaliza ona, maibé tenke lori ba Konsellu Ministru atu hetan aprovasaun mak foin halo trial.
“Nune’e, bainhira tama ona trails ne’e empreza ne’ebé atu responsabiliza serbisu ne’e tenke hahú kedas tuir formasaun no jere. Entaun, prosesu la’o ona [to’o] finál, hein de’it tempu, sei iha ajenda Konsellu Ministru hodi hetan aprovasaun no nomeia konsellu sira ne’ebé atu dirije ka operasionaliza kabu ne’e pois mak bele hahú teste”, Ambrósio Amaral informa ba Tatoli, ohin.
Nia adianta katak iha fin Janeiru ne’e ekipa téknika na’in-tolu husi Fransa halo ona preprasaun no agora hein de’it halo trial.
Tuir nia, buat importante mak kabu ne’e instaladu ona no agora prosesu sira ne’e atu kompleta de’it buat ne’ebé hein kle’ur mak asinatura Cable Connection and Framework Services Agreement ba finalizasaun kabu submarinu fibra ótika entre Governu Timor-Leste no empreza VOCOS, ne’ebé asina tiha ona iha 12 Dezembru tinan kotuk. “Fiar katak ita-nia kabu submarinu ne’e sei ready for service iha tinan ne’e”, nia garante.
Lembra katak Cable Connection and Framework Services Agreement ne’e nu’udar etapa importante ida ba operasionalizasaun servisu kabu submarinu fibra ótika, tamba permite ona empreza instaladora hamutuk ho VOCUS no ekipa Timor-Leste South Submarine Cable (TLSSC) bele hahú no superviziona trial ka teste iha primeiru trimestre 2025.
Asinatura akordu ida-ne’e ho durasaun tinan 17 ho pagamentu operasaun no manutensaun ho kustu totál rihun $840 kada tinan.
Rekorde katak, iha Juñu 2024, inisia ho lansamentu ba instalasaun Sistema Kabu Submarinu Súl Timor-Leste nian (ka Timor-Leste South Submarine Cable/TLSSC) iha Bebonuk no iha Setembru 2024, halo koneksaun ba Sistema Kabu Norte-oeste (North-West Cable System / NWCS) VOCUS nian.
Notísia relevante: Governu planeia halo teste ba fibra ótika ligasaun internasionál iha fevereiru 2025
Jornalista: Arminda Fonseca
Editora: Maria Auxiliadora
