VIKEKE, 23 Fevereiru 2024 (TATOLI)—Antigu Prezidente Repúbliku no Primieru-Ministru, Jenerál Taur Matan Ruak, hateten polítika Governu ba implementasaun podér lokál no dezentralizasaun administrativa ne’e importante ba dezevolvimentu iha munisípiu sira.
Notísia Relevante: Kaleidoskópiu: preparasaun ba implementasaun podér lokál no desentralizasaun administrativa
“Ohin loron, ita haree dezenvolvimentu la’o no joven barak halai ba sidade. Kondisaun ne’ebé presiza implementa mak podér lokál no desentralizasaun administrativa ne’ebé Governu anteriór esforsu no Governu agora mós kontinua esforsu hodi kontribu ba implementasaun,” Jenerál Taur Matan Ruak hto’o nia intervensaun iha semináriu ne’ebé organiza husi F-FDTL hodi selebra loron transformasaun FALINTIL ba F-FDTL ba da-24, ho tema “A Luta de um povo em tempos difíceis pela livertasaun nasionál e uma nova luta justisa sosiciaál no prosesu de dezenvolvimentu nasionál”, iha salaun Parokia Ossú, sábadu (22 Fevereiru 2024) ne’e.
Tuir nia, atu implementa polítika podér lokál no dezentralizasaun administrativa ne’e ninia preparasaun lejislasaun lubuk ida hafoin mak tama ba implementasaun.
“Uluk, hanoin iha tinan 2022, 2023 no 2024 ne’e ita tama ona eleisaun munisipál maibé lakonsege implementa eleisaun. Maibé, agora previzaun implementa iha tinan 2027, nune’e espera bele akontese,” nia hateten.
Ho ida-ne’e, nia dehan, implementasaun dezentralizasaun administrativa no podér lokál ne’e rekursu umanu sira tenke koloka mai munisípiu hodi jere, kria planu no programa hodi kontribui no implementa Governu sentrál nia polítika.
“Ha’u hanoin ida-ne’e mak importante. Se ida-ne’e mak ita la konsege, ita tenke aumenta programa hodi benifísia ba povu iha área rurál. Ezemplu, iha ha’u-nia Governasaun uluk, implementa konstrusaun eskola komunitáriu no Uma Kbiit Lake ka Uma Naromak ba Povu ne’ebé implementa iha suku, ho objetivu atu joven sira labele hala’i mai hotu ba Dili,” nia dehan.
Nune’e, nia hateten, Governante sira-nia funsaun mak oinsá define polítika públika integra hodi populasaun sira bele sente ba ukun rasik aan.
Iha biban ne’e, Paroku Ossú, Pe. José Gonçalves, hateten populasaun Ossú maioria ladún hetan ba finanseira nune’e presiza kria dezenvolvimentu mai iha postu administrativu no suku sira.
“Ha’u kobre hotu suku 10 iha postu Ossú, ha’u haree povu kiik sira susar hetan hetan finanseiru ka osan. Nune’e, ita-nia joven barak mak halai hotu ba Dili, hodi buka osan dolar. Tan ne’e, Governante sira preisza kria buat ruma, atu ema labele tun hotu ba Dili, presiza Dezenvolvimentu ne’ebé abranje to’o iha postu no suku,” nia dehan.
Notísia Relevante: Vizita PM iha munisípiu pasu pozitivu ba implementasaun podér lokál
Jornalista : Vitorino Lopes da Costa
Editór : Cancio Ximenes
