DILI, 24 Fevereiru (TATOLI) – Ministériu Transporte no Komunikasaun (MTK), liuhusi Diresaun Nasionál Transporte no Terrestre (DNTT) rekolla, husi Janeiru to’o Dezembru 2024, reseita hamutuk millaun $5,7 ba kofre Estadu.
Xefe Departamentu Veíkulu iha DNTT, Marcelina Peloi, hateten reseita ne’e mai husi atividade rejistu importasaun ba veíkulu, inspesaun ba karreta, xapa espesiál, transporte públiku no trata karta kondusaun.
Nia esplika katak reseita ba rejistu veíkulu hahú husi Janeiru to’o Dezembru hamutuk millaun $2,7, inspesaun ba importasaun veíkulu $328.320, substitui dokumentu livrete $63.610, dokumentu subtitui provizoriomente livrete orjinál veíkulu (DSPLOV), $4.694, xapa espesiál $43.200, transporte públiku $201.010, karta kondusaun $668.706 no inspesaun veíkulu millaun $1,6.
Kona-ba importasaun ba veíkulu iha tinan kotuk hamutuk 35.807, kompostu husi karreta 7.587 no motorizada 28.220.
“Ita mós rejistu ba transporte públiku ne’ebé tama sai iha fronteira terrestre Bobonaru-Batugadé no Rejiaun Administrativa Espesiál Oekusi iha 2024 hamutuk 2.655, ne’ebé kompostu husi karreta privada 5.109 no Estadu hamutuk 1.546”, Marcelina adianta.
Relembra katak, iha 2024, DNTT mós halo akizisaun ba xapa matríkula orijinál ba karreta no motór hamutuk rihun 10 ho totál orsamentu rihun $110 ne’ebé sosa husi empreza xineza Auto Zone.
Xapa matríkula orijinál ne’ebé DNTT prodús ona ba karreta ki’ik husi B.21-636 TLS, karreta boot A.55-605 TL no motór to’o ona X-1089 TL.
Iha 2023, DNTT mós halo importasaun ba veíkulu hamutuk 86.623, karreta 28.587 no motór 35.236 ho totál reseita hamutuk millaun $2,1.
Notísia relevante: DNTT rejista importasaun motór elétrika 144 iha tinan kotuk
Jornalista: Arminda Fonseca
Editora: Maria Auxiliadora
