Ministru Donaciano sei partisipa Retiru ADMM iha Penang
PENANG, 24 Fevereiru 2025 (TATOLI)—Ministru Defeza, Donaciano Costa Gomes ‘Pedro Klamar Fuik’ akompaña ho nia delegasaun sei partisipa iha Retiru ba Ministru Defeza ASEAN (ADMM – ASEAN Defence Minister’s Meeting) Retreat, ne’ebé sei realiza iha Penang, Malázia iha loron 26 Fevereiru 2025.
Retiru ADMM hanesan enkontru importante ida ba Ministru Defeza husi estadu membru ASEAN, ho objetivu atu haburas diálogu no kooperasaun kona-ba asuntu seguransa rejionál.
Eventu ne’e sai hanesan plataforma informál ida ne’ebé ministru sira bele diskute dezafiu urjente seguransa nian, fahe perspetiva sira, no esplora abordajen kolaborativu sira hodi kria dame no estabilidade iha rejiaun Ázia.
Timor-Leste antes ne’e envolve ona iha diskusaun no desizaun importante ASEAN nian no Ministeriu Defeza Timor-Leste mós partisipa ona iha Reuniaun ADMM ba dala-17, ne’ebé realiza iha loron 15-16 Novembru 2023, iha Jakarta, Indonézia, hafoin Timor-Leste hetan aprovasaun ofisiál nu’udar nasaun observadór ho aspirasaun atu sai membru plenu ba ASEAN.
Iha Retiru ADMM 2025, Timor-Leste hetan hikas konvite husi asosiasaun rejionál ne’e hodi partisipa iha eventu boot, ne’ebé reprezenta husi Ministru Defeza, Donaciano Costa Gomes ‘Pedro Klamar Fuik’ hamutuk ho delegadu na’in-11 seluk.
Notísia relevante : Ministru Defeza ho Xefe Governu diskute planu dezenvolvimentu F-FDTL
Tuir oráriu ne’ebé fó sai ona husi Servisu ASEAN iha Malázia, Retiru ADMM 2025 sei hala’o iha Otél Shangri-La Rasa Sayang, ne’ebé sei hahú ho Enkontru Grupu Traballu Ofisiál Superiór Defeza ASEAN nian (ADSOM WG – ASEAN Defence Senior Officials’ Meeting Working Group), iha loron 25 Fevereiru 2025.
Iha enkontru referidu, Timor-Leste sei reprezenta diretamente husi Diretór Nasionál Kooperasaun Interministeriál no Ajénsia iha Ministériu Defeza, Jerónimo Freitas.
Iha loron hanesan, sei kontinua ho enkontru bilaterál husi Ministru Defeza nasaun membru ASEAN no nasaun sira seluk ne’ebé marka prezensa.
Ministru Defeza Donaciano nia prezensa iha Retiru ne’e sei hatudu pasu ida atu hametin relasaun diplomátika no seguransa iha rejiaun Sudeste Aziátiku no integrasaun iha relasaun kooperasaun defeza ASEAN nian.
Objetivu prinsipál Retiru ADMM nian maka atu fornese espasu ida ba diskusaun nakloke entre Ministru Defeza sira no permite troka opiniaun ne’ebé nakloke liu kona-ba kestaun seguransa oin-oin ne’ebé afeta ASEAN no nia Estadu-membru sira.
Retiru ADMM nian normalmente hala’o tidana-ida ka tinan-rua dala ida, depende ba kontestu no nesesidade rejionál sira.
Jornalista : Cidália Fátima
Editora : Julia Chatarina
