DILI, 25 Fevereiru 2025 (TATOLI)—Vise Primeiru-Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hateten Governu selu ona dívida hamutuk millaun $9 resin bá ospitál tolu iha rai-li’ur hanesan Malázia, Singapura no Indonézia.
“Kuaze millaun $9 resin mak ita selu tiha ona ba ospitál tolu iha rai-li’ur hanesan Malázia, Singapura no Indonézia. Agora daudaun, ekipa sira nafatin halo verifikasaun ba invoice sira ne’ebé iha,” Assanami dehan ba jornalista sira iha Hotel Hilton, Fatuhada, tersa ne’e.
Nia dehan, Governu orienta hela ministra saúde no vise ministru saúde na’in-rua atu haree didi’ak invoice sira nune’e bele selu dívida ne’ebé TL iha.
“Tanba ne’e, Governu nia responsabilidade nafatin orienta bá ministra ho nia vise na’in-rua atu haree didi’ak invoice sira atu ita bele selu dívida ne’ebé ita iha,” nia esplika.
Nia informa, Governu iha planu ona ba futuru mak iha moras sira hanesan kurasaun, kankru, rins, bele halo tratamentu mós iha rai-laran.
“Moras todan hanesan kurasaun, kankru no rins, ita buka dalan atu tratamentu iha rai-laran. Ita buka espesialista sira mai, buka materiál teknolojia ne’ebé importante. Tanba ne’e, ita tau-matan hela ba ospitál Lahane. Hein katak tempu badak bele rezolve buat balun,” nia haktuir.
Notísia relevante: PM Xanana orienta MS selu dívida iha ospitál Malázia-Singapura-Indonézia
Iha sorin seluk, Vise Ministru Fortalesimentu Institusionál Saúde, José dos Reis Magno, esplika Govenu liuhusi Ministériu Saúde selu ona dívida iha nasaun Malázia, Indonézia no Singapura hamutuk millaun $9 resin no tinan ne’e Governu aloka tan millaun $8 atu selu.
“Dívida balun ita selu ona no agora orsamentu iha hela. Ita tenke hare didi’ak invoice ne’ebé mak loron-loron sira halo tratamentu ba ita-nia pasiente hatama mai ne’e, entaun ita verifika didi’ak foin ita selu tan,” José konklui.
Antes ne’e, reprezentante Governu liuhusi Sekretária Estadu Igualdade Jéneru, Elbina de Sousa, hato’o ba deputadu sira iha Parlamentu katak totál dívida ospitál estranjeira ne’e hamutuk millaun $20 no ne’e akumulativu husi dívida ne’ebé VIII Governu Konstitusionál husik hela.
“Dívida millaun $20 ba ospitál sira iha rai-li’ur ne’e akumula husi Governu anteriór ka Governu Konstitusionál Daualu (VIII) nian, maibé Governu Dasiak komprometidu atu rezolve. Hanesan uluk ha’u hato’o ona, ami presiza tinan ida tomak atubele rezolve sira-ne’ebé mak maihusi eransa Governu Daualu nian,” nia esplika iha plenária Parlamentu Nasionál, 01 Outubru 2024.
Nune’e mós, antes ne’e, Vise Ministru ba asuntu Parlamentár, Adérito Hugo da Costa, hateten Governu sentrál liuhusi Primeiru-Ministru (PM), Kay Rala Xanana Gusmão, orienta ona Ministériu Saúde (MS) atu rezolve lalais dívida iha ospitál Malázia, Singapura no Indonézia.
Iha Orsamentu Jerál Estadu (OJE) 2023 ho orsamentu retifikativu 2023 no OJE 2024 mós prevee atu selu dívida sira-ne’e, maibé dívida sira-ne’e ministériu akompaña hela ospitál sira-ne’e, tanba husi MS pronúnsia dezde inísiu katak, tanba ho montante ne’ebé aumenta boot, entaun antes sira halo pagamentu tenke halo investigasaun ka auditoria.
Maibé, nia dehan, bainhira hanoin halo auditoria loloos no la hein tan ho montante dívida aumenta tan, agora kuaze millaun $20, tan ne’e Governu sentrál simu ona informasaun husi ospitál sira-ne’e hodi orienta MS atu rezolve lalais.
“Orientasaun husi Konsellu Ministru liuhusi Primeiru-Ministru ba Ministériu Saúde atu imediatamente halo kontatu ho ospitál sira-ne’e atu rezolve asuntu ne’e ho lalais,” nia hateten ba jornalista sira iha resintu Parlamentu Nasionál (PN), 24 Setembru 2024.
Jornalista: Felicidade Ximenes
Editór: Xisto Freitas da Piedade
