DILI, 25 Fevereiru 2025 (TATOLI)–Dirijente eskola sira iha Dili laran husu ba Ministériu Edukasaun (ME) atu kontrola programa merenda eskolár, nune’e bele hasae kualidade nutrisaun ba estudante sira.
Diretór Ensinu Báziku 30 Agostu, Baltazar Borromeu, hatete objetivu prinsipál husi merenda eskolár mak hasa’e nutrisaun no hamenus númeru má nutrisaun, motiva labarik sira hodi tuir ensinu-aprendizajen ho di’ak.
“Governu tenke kontrola kualidade, hahú husi hahán, fasilidade ba merenda eskolar ne’e tenke sufisiente”, Baltazar Borromeu dehan iha nia knaar fatin Komoro, tersa ne’e.
Biban ne’e Baltazar dehan, programa merenda eskolar tenke ho nesesidade koziña, ida-ne’e governu tenke prepara, nune’e labarik sira uza hodi han.
“Ami labele haruka fali estudante sira lori husi uma mai, hanesan bikan no kanuru, kuandu sira mak lori ida ne’e, impaktu mós ba prosesu aprendizajen, tanba ne’e, ami-nia lia-menon mak governu tenke haree ida ne’e”, nia dehan.
Nune’e mós, Koordenadór Pré-Eskolar Sagrada Família Vila-Verde, Cornelio António Soares, preokupa fasilidade no menu ba merenda eskolár ne’ebé laiha mudansa ba estudante sira.
“Merenda eskolar ne’e atu garante labarik sira-nia nutrisaun, bainhira ita ko’alia kona-ba nutrisaun ita tenke garante fasilidade ne’ebé di’ak, dapur la sufisiente, menu laiha mudansa susar ita atu garante merenda eskolár ho ijiene ba labarik sira”, nia dehan.
Nune’e nia prefere katak iha merenda eskolár ne’e presiza iha mós hahán lokal hodi aumenta nutrisaun ba estudante sira.
“Ita bele dehan merenda eskolar ne’e, atu ajuda labarik sira iha enerjia aprende, karik ita fó hahán ne’ebé la di’ak ka laiha vitamina ba labarik, mak sei impaktu fali ba labarik sira-nia prosesu aprendizajen”, dehan Cornelio.
Enkuantu, Diretór Eskola Ensinu Báziku Sentrál, Esperansa da Pátria, João da Silva Pereira, husu atu harii fatin merenda eskolár ho dignu no di’ak atu bele han.
“Ba fatin merenda eskolár ne’e mak ladun sufisiente ba labarik sira, tanba ita-nia hakarak ne’e fatin di’ak ba sira, hodi tuur para han. Atu han ne’e fatin tenke dignu no seguru, bainhira sira tuur de’it iha rai mak han, oinsá ita bele garante saudável hosi hahán ne’ebé sira han, ita tenke hanoin ba labarik sira-nia ijiene”, dehan.
Nia haktuir, maske fasilidade ba merenda eskolar la sufisiente, maibé eskola kontinua implementa merenda eskolár, tuir menu ne’ebé iha.
“Menu ne’ebé iha, nafatin anteriór nian tanba ne’e husu ba Ministériu Edukasaun, atu harii fatin ba merenda eskolár ho di’ak, kompleta ho sala ba han nian, kadeira no meza, nune’e estudante sira han mós tuur iha fatin ne’ebé di’ak”, tenik.
Tuir artigu 26 lei organika Ministériu Edukasaun nian, ne’ebé aprova ona iha 2013, estabelese responsabilidade ba Diresaun Nasionál Asaun Sosiál Eskolár (DNASE), hanesan serbisu sentrál, katak hodi responsável ba ezekusaun lala’ok Asaun Sosiál Eskolar nian, ne’ebé promove ona iha Ministériu Edukasaun, ba sistema edukasaun pré-eskolar no ensinu báziku, espesiál liu ba programa merenda eskolár.
Notísia relevante: Ministériu Edukasaun inaugura kampu multifunsaun no koziña merenda eskolár iha EBC Farol
Jornalista : Osória Marques
Editora : Rita Almeida
