Kondisaun saúde Papa hatudu progresu di’ak uitoan maski sei iha estadu krítiku
DILI, 25 Fevereiru 2025 (TATOLI) – Kondisaun klínika Papa Francisco, maski sei iha estadu krítiku, hatudu progresu di’ak uitoan, informa nota ne’ebé Tatoli asesu husi Vatican News.
“Kondisaun klíniku Santu Padre, iha estadu krítiku, di’ak uitoan. Nomós, ohin laiha epizódiu krize respiratória asmátika. Ezame laboratóriu balun aprezenta rezultadu di’ak”, nota ne’e hateten.
Parte Vatikanu, liuhusi dokumentu ne’e subliña katak insufisiénsia renál kmaan ne’ebé Papa Francisco sofre ne’e la’ós preokupante ona. Hodi hatutan katak terapia oksijéniu kontinua, maski ho fluxu no persentuál oksijéniu lijeiramente hamenus.
“Médiku sira, konsidera komplesidade kuadru klíniku, ho prekausaun seidauk bele halo prognóstiku”, dehan.
Maski iha kodisaun saúde ne’ebé sei krítiku, Papa Francisco iha dadeer (oras Roma nian) nafatin hala’o atividade eukarístika no, iha loraik, hala’o nia serbisu. “Iha kalan telefone ba pároku Parókia Gaza hodi espresa nia proximidade paterna. Papa Francisco agradese ba povu hotu ne’ebé iha loron hirak ne’e hamutuk hodi reza ba nia saúde”, konklui.
Lembra katak Santu Padre hahú halo tratamentu saúde iha Ospitál Gemelli, Roma, iha loron 14 Fevereiru 2025 tanba sofre pneumonia bilaterál.
Notísia relevante: Vatikanu relata kondisaun Papa Francisco sei krítiku
TATOLI
