VIKEKE, 25 Fevereiru 2025 (TATOLI)—Prezidente Asosiasaun Feto munisípiu Vikeke, Luciana Guterres, reeleitu sai prezidente asosiasaun feto potensiál ba períodu 2025-2028 hafoin liuhusi votasaun iha kongresu datoluk.
Notísia Rrelevante: SEI enkoraja feto potensiál Vikeke kompete iha eleisaun lideransa komunitária
Prezidente eleitu ne’e haktuir, reprezentante feto sira husi postu administrativa lima (5) iha munisípiu Viqueque kontinua fó konfiansa ba nia hodi lidera dala ida tán ba Asosiasaun feto poténsial munisípiu Vikeke.
“Ba konfiansa ne’e ha’u estrutura sei haree planu sira-ne’ebé tinan hirak ba kotuk, ami la konsege implementa programa balun. Nune’e, ba periodu ida-ne’e ami sei esforsu liután hodi implementa programa sira-ne’ebé prioridade ba maluk feto sira iha área rurál no urbana sira,” Luciana Guterres hateten ba jornalista sira, iha resintu munisipál Vikeke, ohin.
Nia dehan, dezafiu ne’ebé durante iha mandatu dahuluk mak legalidade asosiasaun nian nune’e difisil hetan fundu hodi implementa atividade Asosiasaun Feto Potensiál Vikeke nian.
“Maibé, iha tinan kotuk (2024) ami konsege rejista ona iha Ministériu Justisa no hetan ona legalidade Asosiasaun nian, ne’ebé fasil ona ba ami hodi buka fundu husi parseiru sira, atu empodera maluk sira-ne’ebé iha munisípiu no postu sira,” nia dehan.
Ba mandatu ida-ne’e, nia dehan, estrutura asosiasaun feto potensiál sira iha postu sei halo identifikasaun feto potensiál, maluk ema ho defisiensia no maluk feto kbiit laek sira, atu nune’e ita fó formasaun área jestaun ekonómia, foti desizasaun, polítika no área sira seluk ba maluk feto sira hodi hakbi’it sira nian koñesementu hadi’a moris.
“Programa formasaun sira-ne’e mak sai ami-nia príoridade ba ami-nia maluk feto sira iha Vikeke,” nia dehan.
Iha fatin hanesan, membru Asosiasaun Feto Potensiál Munisípiu Vikeke, Domingas Guterres, haktuir membru asosiasaun feto munisípiu Vikeke fó ona konfiansa estrutura eleitu sira kontinua luta ba maluk feto sira liuliu ba programa príoridade sira-ne’ebé planeia iha períodu tinan haat nian.
“Tan ne’e, ha’u hakarak sujere ba estrututa eleitu tenke tau importánsia ba programa formasaun ba maluk feto sira, atu hasa’e ami-nia koñesementu ba feto Vikeke hotu-hotu. Nune’e mós labele haree ba kór, relijiaun no ras,” nia hateten.
Entretantu, partisipa iha kongresu datoluk husi Asosiasaun Feto Potensiál munisípiu Vikeke hamutuk na’in-180, iha prosesu votasaun pakote rua (2) maibé pakote prezidente reeleitu manán maioria.
Kongresu ne’e durante loron rua hahú loron 24 to’o 25 fulan-Fevereiru 2025 no hetan observadór husi funsionáriu Sekretária Estadu Igualidade (SEI), no estrutura Asosiasaun Feto potensiál Vikeke eleitu ba períoduagora nian ne’e hamutuk na’in-20.
Jornalista : Vitorino Lopes da Costa
Editór : Cancio Ximenes
