SEI enkoraja feto potensiál Vikeke kompete iha eleisaun lideransa komunitária
VIKEKE, 24 Fevereiru 2025 (TATOLI)—Sekretária Estadu Igualidade (SEI), Elvina de Souza Carvalho, enkoraja feto poténsial munisípiu Vikeke kontinua kapasita aan hodi kompete iha eleisaun lideransa komunitária.
Notísia Relevante: SEI presiza kapasita feto iha área rurál partisipa vida polítika no ekonomia
“Atu konkore ba iha eleisaun sira tenke prepara ita-nia koñesementu ho di’ak hodi bele hetan konfiansa husi komunidade. Tan ne’e, ha’u husu feto sira iha Vikeke tenke prepara aan liuhusi formasaun sira hodi hariku ita-nia koñesementu,” Governante ne’e hateten iha kongresu asosiasaun feto poténsia Vikeke ho tema “Haforsa Asosiasaun feto munisípiu hodi kontribui dezentralizasaun no podér lokál”, iha salaun munisípiu Vikeke, ohin.
Nia hatutan, atu sai xefe aldeia no xefe suku presiza investe aan iha sosiadade no agora ba oin feto sira tenke investe aan hasa’e koñesementu ligasaun ho komunidade.
“Asosiasaun feto nian mak fó apoiu no akompaña ba feto maluk sira, maibé desizaun iha feto sira-nia liman. Tanba, ita atu implementa eleisaun kámara munisipál partisipasaun feto iha 35%, nune’e ba feto maluk sira tenke prepara aan. Dala ida tan, se ita ko’alia promove feto maibé feto ho feto sira mak la apoia malu, lolos ne’e ita tenke apoia malu,” Elvina dehan.
Aleinde ne’e, nia husu estrutura Asasiasaun feto munisípiu Vikeke nafatin akompaña feto maluk sira, koordena ho organizasaun sosiadade sivíl hodi oferese formasaun ba feto sira iha Vikeke.
“Ha’u husu asosiasaun feto Vikeke nafatin akompaña maluk feto sira no buka parseiru sosiadade sivíl sira seluk, hodi fó formasaun ba feto sira. Governu liuhusi SEI sei kontinua fó apoiu ba asosiasaun feto iha munisípiu sira hodi implementa sira-nia atividade,” nia hateten.
Prezidente Autoridade Munisípiu (PAM) Vikeke, Francisco Cruz Simões de Gonzaga Soares, husu komunidade Vikeke tenke tane aas dignidade feto, nune’e mós ba feto sira tenke hanoin hamutuk labele kria kór keta-ketak.
“Ha’u apresia ba servisu asosiasaun feto Vikeke ne’ebé durante ne’e esforsu hodi halo advokasia makaas. Tan ne’e, ita presiza dudu sira liuhusi kapasita ba ita-nia feto maluk sira liuhusi kursu ba sira, hodi hasa’e sira-nia koñesementu. Nune’e, ita sei fó asisténsia ba feto sira hodi harii rasik sira-nia empreza atu bele kompete,” nia dehan.
Prezidente Asosiasaun feto munisípiu Vikeke, Lucia Guterres, hateten asosiasaun feto munisípiu Vikeke realiza kongresu ba datoluk hodi hili estrutura foun no asosiasaun sei promove advokasia, kria diskusaun grupu no peskiza hodi bele muda sosiadade sira-nia hanoin no konsiénsia.
“Ami sei kria formasaun ba kada uma kain sira kona-ba jestaun hirus, hodi prevene ba violénsia doméstika iha Vikeke. Tan ne’e, ha’u husu Governu liuhusi SEI oferese formasaun ba estrutura asosiasaun feto Vikeke no apoiu finanseiru hodi asosiasaun hala’o atividade,” nia dehan.
Feto munisípiu Vikeke ne’ebé partisipa iha kongresu ne’e hamutuk na’in-184, ne’ebé mai husi postu administrativu lima (5) ne’ebé kompostu husi delegada, juventude feto, xefe aldeia feto, feto emprezariál, feto soru-tais iha munisípiu Vikeke.
Iha abertura kongresu asosiasaun feto munisípiu Vikeke ne’e hetan partisipa husi administradór postu lima, xefe suku, Polísia Nasionál Timor Leste (PNTL) munisípiu Vikeke.
Prezidente Asosiasaun husu PAM oferese fatin propriu
Entretantu, Prezidente Asosiasaun Feto munisípiu Vikeke, Lucia Guterres, husu Prezidente Autoridade munisípiu Vikeke atu oferese fatin propriu ruma ba asosiasaun hodi uza halo atividade.
“Kona-ba ami-nia ezisténsia ami hakarak husu ba autoridade munisípiu Vikeke, buka fatin propriu ruma ba ami, atu ami uza ba atividade feto nian iha Vikeke. Ami durante ne’e fatin propriu laiha, ami sente sai dezafiu ida ba ami. Tan ne’e mak ami husu ba autoridade hodi oferese fatin ba ami, atu ami bele uza hodi atende ba ami-nia feto maluk sira,” Lucia Guterres hateten.
Hatán ba preokupasaun ne’e, Prezidente Autoridade Munisípiu (PAM) Vikeke, Francisco Cruz Simões de Gonzaga Soares, dehan kona-ba preokupasau ne’e autoridade sei tau ba konsiderasaun hodi apoiu asosiasaun feto hala’o servisu loro-loron nian,
“Ha’u hakarak hateten kona-ba preokupasaun ba fatin, ita sei haree no buka hodi oferese ba asosiasaun feto potensiál munisípiu Vikeke hodi uza ba servisu. Ita presiza kria kondisaun ida hodi fó oportunidade ba feto sira, atu lori asoisasaun sira mai munisípiu,” nia hateten.
Jornalista : Vitorino Lopes da Costa
Editór : Cancio Ximenes
