VIQUEQUE, 04 novembru 2024 (TATOLI)- Prezidente Asosiasaun Feto munisípiu Viqueque, Lucia Guterres, husu Governu liuhusi Sekretáriu Estadu Igualidade (SEI) presiza kria kapasitasaun ba feto sira iha área rurál hodi partisipa vida polítika no ekonómia iha munisípiu Viqueque
“Komemorasaun loron nasionál feto ne’ebé monu iha loron 03 Novembru ba tinan ida-ne’e, ami laiha fundu hodi selebra. Nune’e ami esforsu husu apoiu ba parte relevante, maibé la hetan. Ho ida-ne’e ami hakarak rekomenda ba Governu liuliu SEI no instituisaun sira seluk ba oin presiza kaderniza maluk feto sira liuhusi formasaun ba polítika no ekonómia, atu maluk feto sira iha koñesementu hodi partisipa iha vida polítika no ekonómia iha Timor Leste”, Lusia Guterres, ba TATOLI, iha postu Viqueque, segunda, ohin.
Líder feto potensiál munisípiu Viqueque ne’e profunda, SEI presiza fó apoiu Asosiasaun Feto munisípiu Viqueque atu hakbi’it ba feto sira iha área rurál hodi partisipa iha área polítika, sosiál, ekonómia no kultura.
“Tanba área sira-ne’e ami konsidera katak importante tebes ba ami-nia maluk feto sira iha munisípiu Viqueque. Alende ne’e ami hato’o ba SEI kada tinan fó fiar ba asosiasaun hodi selebra loron nasionál feto iha munisípiu ida-idak, atu enkoraja ba ami-nia maluk feto sira”, nia hato’o.
Nia dehan, programa SEI atu hakbi’it feto rurál liu husi empoderamentu feto oinsá feto sira bele asesu ba fundu transferensia públika ba grupu vuniravél.
“Kona-ba akompañamentu feto iha vida ekonómia asosiasaun feto munisípiu Viqueque durante ne’e akompaña grupu feto hamutuk 20 ho totál membru 229, ami mak akompaña direita atividade soru tais no atividade ortikultura”, nia akresenta.
Nune’e mós nia dehan, asosiasaun feto sei servisu hamutuk ho parseiru sira atu redús violénsia doméstika hasoru feto sira iha munisípiu Viqueque.
“Tanba durante ne’e ami rejista kazu violénsia doméstika hamutuk 12 no halo akompañamentu ba prosesun kazu sira-ne’e. Iha kazu rua maka ami prosesa ona ba tribunál no seluk sei iha Ministériu Públiku. Ba oin ami sei luta halo sensiblizasaun hodi redús “. tenik nia.
Jornalista : Vitorino Lopes da Costa
Editór : Florencio Miranda Ximenes
