ME sei xamada kandidatu profesór hodi konfirma kolokasaun
DILI, 25 Fevereiru 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, informa semana oin ME sei xamada kandidatu profesór ho valór 60-65 sira hodi konfirma kolokasaun, nune’e bele koloka.
“Semana oin ami halo xamada ba kandidatu sira atu mai haree fatin ne’ebé sei koloka sira, sira simu ka lae, se sira aseita mak ita sei koloka tuir fatin ne’ebé sira hakarak”, hatete nia ba TATOLI iha Vilaverde, tersa ne’e.
Nia hatutan: “Kandidatu bolsa kandidatu ba Ensinu Báziku maibé tanba nesesidade Pre-eskolár nian mak ami xamada, katak se mak hakarak hanorin iha Pre-eskolár nian, kuandu sira aseita ita koloka maibé kuandu la aseita entaun nafatin ho númeru ne’ebé iha ne’e”.
Momentu ne’e, ME iha kandidatu 1296 ne’ebé mak iha hela bolsa, nune’e sei iha biban atu koloka kandidatu sira-ne’e ba vaga sira hanesan Pre-eskolár ne’ebé daudaun ne’ebé presiza iha eskola públiku sira.
Nia dehan, bazeia ba kuadru pesoal diploma ministeriál númeru 74/2024, 14 Outubru, no bazeia ba desizaun husi Komisaun Funsaun Públika (KFP), ho númeru 6857/2025/KFP, ne’ebé aprova vaga hamutuk 213, ne’ebé sei koloka ba kandidatu sira. Entaun, bolsa kandidatu ne’e ba Ensinu Báziku hamutuk 1296 ne’e mak iha bolsa laran. Maibé nesidade manorin Pre-eskolár nian, nune’e Ministériu Edukasaun halo xamada ba kandidatu sira.
“Nia desizaun atu aseita no rejeita númeru seriesaun ne’ebé implika ba kandidatu sira. Bainhira sira rejeita ba xamada ne’ebé ami sei fó sai iha tempu badak. Ministériu Edukasaun mós sei fó tempu ba kandidatu sira hodi halo survei ba fatin kolokasaun molok sira aseita, asina xamada hosi Ministériu Edukasaun. Nune’e kandidatu hetan informasaun klaru molok sira foti desizaun”, nia dehan.
Tuir planu bainhira kandidatu aseita mak ME sei oferese tan formasaun insentiva ba sira durante semana ida molok simu pose ba kolokasaun ne’ebé sira aseita.
Notísia relevante: Ministériu Edukasaun husu bolseiru ba kandidatu profesór ho valór 60-65 atu verifika dokumentu
Jornalista : Osória Marques
Editora : Rita Almeida
