DILI, 16 Janeiru 2025 (TATOLI) – Ministériu Edukasaun (ME) husu ba kandidatu bolseiru ba profesór ho valór 60-65 atu verifika dokumentu iha Institutu Nasionál Formasaun Dosente Profisionál no Edukasaun (INFORDEPE), atu bele define kolokasaun.
“Agora ami informa hela ba ita-nia bolsu kandidatu ba profesór iha munisípiu sira ne’ebé ho valór 60-65 hodi verifika fali sira-nia dokumentu, liuliu naran, data moris no seluk tan, atu nune’e define tiha kedas hodi hein ita-nia kuadru pesoál Ministériu Edukasaun nia desizaun ba identifiksaun eskola ne’ebé presiza profesór”, Diretór Nasionál Rekursu Umanu iha ME, João Amaral, hateten iha nia knaar fatin, Vila Verde, kinta ne’e.
Amaral informa, loron ba verifikasaun dokumentu hahú ona iha segunda liubá no sei remata iha sesta semana ne’e.
“Ita-nia bolsa kandidatu profesór naran iha hela bolsa ministériu edukasaun nian. Entaun ita hein de’it kuadru ne’e sira bainhira idenfika ona eskola grave ka eskola ne’ebé presiza profesór hafoin Ministériu Edukasaun deside hodi koloka maibé ida-ne’e mós fazeadamente la’os dala ida”, nia dehan.
Totál bolseiru ba kandidatu profesór ho valór 60-65, hirak ne’e hamutuk 1242. Programa bolsa kandidatu ba profesór sira implementa bazeia ba Dekretu-Lei Númeru 31/2023 kona-ba Estatutu Karreira Edukadór. Tanba ne’e, ME halo prosesu rekrutamentu bazeia ba kuadru pesoál.
Jornalista: Osória Marques
Editór : Zezito Silva