DILI, 26 Fevereiru 2025 (TATOLI)—Delegasaun Komisaun Téknika Akompañamentu (CTA-sigla portugés), hamutuk ho Xefe Misaun no membru Komisaun Desportu Comunidade dos Países de Língua Portuguesa (CPLP), halo observasaun ba otél ualu iha Dili ne’ebé delegasaun no ekipa atleta sira estadia durante jogu CPLP.
“Vizita ne’e atu observa otél hirak-ne’e nia preparasaun entermu fasilidade sira. Otél sira-ne’e mak hanesan Hotel Timor, Hotel Ramelau, Golgota, Timor Plaza, Plaza Hotel, Palm Spring, Novo Turismo no Beach Garden,” Diretór Jerál Desportu, João Maria Rodrigues, dehan ba jornalista sira, iha Timor Plaza, kuarta ne’e.
Notísia relevante: Ekipa CTA hahú observa kampu ba jogu CPLP
Nia haktuir, bazeia ba TL nia aprezentasaun katak nasaun membru sira tenke kolokadu iha otél sira. “Entaun, sira halo konfirmasaun katak otél ne’e iha kapasidade atu akumula hotu fasilidade liuliu internet no wifi sira. Tan ne’e, ami sei enkontru hikas ho país membru hotu-hotu no ami sei aprezenta katak TL preparadu ba jogu iha fulan-Jullu,” nia dehan.
Nia haktuir, tempu badak Governu sei halo enkontru ho otél na’in sira nune’e bele preparadu liu tan.
Jornalista: Felicidade Ximenes
Editór: Xisto Freitas da Piedade
