DILI, 26 Fevereiru 2025 (TATOLI)-Governu liuhusi Ministériu Juventude Desportu no Kultura (MJDK), Sekretáriu Estadu Arte no Kultura (SEAK), hamutuk ho ekipa Komisaun Tékniku Apoiu (CTA, sigla portugés), kuarta ne’e observa kampu sira iha Dili laran hodi realiza jogu entre Komunidade Nasaun ne’ebé ko’alia lian-portugés (CPLP, sigla portugés).
Kampu ne’ebé ekipa sira vizita no haree besik ninian kondisaun mak estádiu munisipál, kampu iha Bekora, jinásiu, kampu voleiból, volipraia, kampu tenis, no basketból.
“Ita-nia enjeñeiru no tékniku hosi Ministériu Juventude Desportu no Kultura nian haree no aprosima halo reabilitasaun ba estádiu munisípiu Dili, tanba prosesu la’o ona”, SEAK, Jorge Soares Cristovão, dehan iha estádiu munisípiu Dili.
Kona-ba orsamentu, nia dehan parte Ajénsia Dezenvolvimentu Nasionál (ADN) mak hatene liu tanba verifikasaun kustu maihusi ajénsia referida.
Nia informa, prosesu reabilitasaun ne’ebé la’o hela mak jináziu, kampu tenis no volipraia. “Ita mós sei observa no vizita estádiu Bekora ne’ebé prontu ona”.
Durante vizita, SEAK esplika ba ekipa konaba fatin seluk ne’ebé preparadu hodi halo reabilitasaun.
Vizita loraik-nian mak sei haree besik otél sira hanesan Hotel Timor, Ramelau, Golgota, Timor Plaza, Palm Spring, Novo Turismo, no Beach Garden.
Notísia relevante: Jogu CPLP: membru CTA no diretór CPLP sira vizita Timor-Leste
Jornalista : Osória Marques
Editora : Rita Almeida
