Governu aprova vaga ba promosaun tuir antiguidade pesoál hamutuk 3.540
DILI, 26 Fevereiru 2025 (TATOLI) – Governu aprova projetu rezolusaun Governu ne’ebé estabelese vaga ba promosaun tuir antiguidade pesoál ne’ebé integra iha karreira Rejime Jerál Administrasaun Públika ba 2025.
Projetu rezolusaun ne’e aprezenta husi Prezidénsia Konsellu Ministru no Komisaun Funsaun Públika.
Tuir nota husi Governu, totál vaga promosaun hamutuk 3.540, ne’ebé estabelese husi rezolusaun Governu ida-ne’e, ne’ebé 60 aloka ba kategoria tékniku superiór hamutuk-Grau A, 223 ba Tékniku Superiór – Grau B, 561 ba Tékniku Profisionál 561- Grau C, 965 ba Tékniku Profisionál-Grau D, 1.051 ba Tékniku Administrativu – Grau E no 680 ba Asistente -Grau F.
Relebra katak, iha 25 Setembru 2024, Governu liuhusi reuniaun Konsellu Ministru aprova ona projetu rezolusaun kona-ba vaga ba promosaun pesoál integradu iha rejime jerál karreira administrasaun públika ba tinan 2024.
Vaga sira ba promosaun ne’e fiksa ona tinan-tinan husi Governu, tuir proposta KFP to’o limite pursentu 10 husi totál pesoál sira iha kada kategoria ka grupu profisionál.
Husi totál vaga promosaun hamutuk 817 ne’ebé rezolusaun Governu ne’e estabelese, koloka 47 ba kategoria Tékniku Superiór 47 – Grau A, 122 ba Tékniku Superiór – Grau B, 188 ba Tékniku Profisionál – Grau C, 234 ba Tékniku Profisionál – Grau D, 149 ba Tékniku Administrativu – Grau E no 77 ba Asistente – Grau F.
Notísia relevante: Governu aprova vaga promosaun pesoál integradu iha karreira administrasaun públika 2024
Jornalista: Arminda Fonseca
Editora: Maria Auxiliadora
