DILI, 26 Fevereiru 2025 (TATOLI)-Ministru Ensinu Superiór Siénsia no Kultura (MESSK), apela ba Institutu Politékniku Betanu (IPB) no Universidade Nasionál Timor Lorosa’e (UNTL), atu fó formasaun ba dosente sira iha área língua.
Ministru, José Honório Guterres, hatete ensinu superiór públiku tenke prepara rekursu, nune’e bele hanorin estudante ho lian ofisiál sira, atu kompete iha futuru. Tanba daudaun ne’e profesór sira husi ensinu superiór privadu inklina-an iha formasaun dalen-portugés.
“Hakarak apela ba IPB ho UNTL, fó formasaun ba profesór sira atu hanorin lian-tetun no portugés, tanba ita haree ensinu superiór privadu sira komesa interese hodi envolve profesór sira ba tuir kursu maestradu iha Portugál, Brazil komesa aumenta, ne’e dezafiu ida ba UNTL ho IPB iha future. Tanba ne’e, IPB ho UNTL tenke prepara an ho didiak, nune’e hanorin sira-nia estudante ho lian ofisiál portugés no tetun, nune’e iha kompetisaun ne’ebé di’ak iha future”, dehan ministru Honório iha salaun INFORDEPE, Balide, kuarta ne’e.
Governante ne’e hatutan, lei baze ensinu superiór mós aprova ona, no hetan ona promulgasaun husi Prezidente Repúblika (PR), tanba ne’e hanesan ministru kontinua hatete ba ensinu superiór sira hanorin lian-tetun no portugés.
“Ida-ne’e importante ba ita-nia rai atu ita forma ita-nia joven sira hodi lori nasaun ne’e ba oin”, dehan ministru.
Nia hatutan, formasaun língua-portugés ba profesór sira-ne’e nesesáriu tebes ba kreximentu akadémiku no pesoál iha ensinu superiór sira.
“Formasaun lian-portugés ne’e nu’udar kompromisu boot husi Ministériu Ensinu Superiór, Siénsia no Kultura, tanba hakarak atu regula uzu lian-portugés iha instituisaun sira, bele iha atividade ensinu ka peskiza”, tenik.
Prezidente Institutu Politékniku Betanu, Acácio Cardoso Amaral, hatete rekomendasaun sira husi MESSK ida-ne’e pertenente tebes. Tanba ne’e IPB sei iha planu atu fó formasaun ba dosente sira iha língua-portugés.
“Formasaun ba ensinu superiór públiku sira-ne’e importante tebes. Tanba língua-portugés ne’e ita-nia língua-ofisiál, gosta ka la gosta ita tenke uza. Daudaun ne’e iha IPB uza língua rua iha ensinu aprendizajen, ne’e mak tetun no portugés. Espera ita bele fó formasaun ba ita-nia profesór sira atu sira bele eleva liután sira-nia koñesimentu iha área língua”, nia dehan.
Nia hatutan, sidadaun barak mak seidauk domina língua-portugés maske dalen referida nu’udar lian-ofisiál Timor-Leste nia, nune’e formasaun importante.
Notísia relevante: MESSK husu IES labele tau kestaun ba lian-portugés
Jornalista : Osória Marques
Editora : Rita Almeida
