DILI, 12 Fevereiru 2025 (TATOLI)-Ministériu Ensinu Superiór Siénsia no Kultura (MESSK), husu ba Institutu Ensinu Superiór (IES) sira iha territóriu atu labele tau kestaun ba língua -Portugés iha prosesu aprendizajen.
Ministru José Honório, hatete IES sira tenke hanorin lian-portugés tanba hanesan dalen ofisiál Timor-Leste nian.
“Konstituisaun artigu 13 hatete klaru ba Timoroan sira, ne’ebé husu ba sira ne’ebé tau kestaun língua ne’e hanoin didi’ak, tanba lian ne’e la mosu de’it mai”, ministru dehan iha salaun MESSK Kolmera, kuarta ne’e.
Ho rezultadu istória ne’ebé naruk, nia dehan dalen-tetun no portugés hanesan Timoroan nian, tanba ne’e, importante liu atu aprende. Mesmu, lian-inglés mos esensiál.
“Ensinu superiór balun hanorin nafatin lian seluk, ha’u hatete ba sira, sira la kumprimenta regra konstituisaun artigu 13”, afirma.
Membru governu ne’e reforsa, instituisaun públiku ka privadu tenke hanorin lian-tetun ho portugés. “Ne’e labele diskute, tinan 20 ita sei diskute língua, ita hakarak lori Nasaun bá ne’ebé, ema ne’ebé lakohi hanorin lian-tetun ho portugés iha ninia instituisaun, ema ne’ebé la hatene istória Timor nian”.
Notísia relevante: MESSK enkoraja civitas akadémiku transmite lian portugés ba ensinu báziku-sira
Iha fatin seluk, Reitór Universidade Katólika Timorense (UCT, sigla portugés) São João Paulo II, Padre Joel Casimiro Pinto, hatete UCT uza língua portugés inklui ingles iha prosesu aprendizajen. Ko’alia tetun bainhira presiza duni atu halo esplikasaun.
“Estudante la ko’alia tetun iha saladeaula, mesmu língua nasionál hotu. Dosente de’it mak iha direitu atu ko’alia iha prosesu aprendizajen”, Reitór UCT dehan.
Padre Joel hatutan, UCT konkorda tebes ho MESSK ninia rekomendasaun sira-ne’e.
“Estudante foun mai ne’e klaru katak hakdasak iha língua, maibé sira koko nafatin, aprende to’o sira bele tanba sira-nia traballu uza portugés de’it”, dehan nia.
Notísia relevante: PR Sujere Hanorin Lian Ofisiál La’ós Materna
Nia dehan, IES nu’udar liman-ain ba ministériu ensinu superiór nia atu implementa, ne’ebé kona-ba língua lalika duvida ho UCT.
Jornalista : Osória Marques
Editora : Rita Almeida
