DILI, 26 Fevereiru 2025 (TATOLI)-Ministru Ensinu Superiór Siénsia no Kultura (MESSK), José Honório Guterres, husu ba Universidade Nasionál Timor Lorosa’e (UNTL) atu tau atensaun ba dormitóriu estudante sira-nia iha Hera.
Nune’e mós husu ba estudante sira ne’ebé mak remata ona estudu tenke husik hela dormitóriu hodi fó fali ba estudante foun sira uza.
“Ha’u-nia apela mak ne’e, sira ne’ebé remata ona estudu labele hela iha ne’ebá, fó fali fatin ba sira ne’ebé foun atu hela. Tanba dormitóriu ne’e ba estudante sira ne’ebé iha valór boot”, dehan Ministru Honório iha salaun INFORDEPE, Balide, ohin.
Governante rekoñese kestaun ne’ebé deputadu sira levanta. Maibé, MESSK seidauk iha planu atu halo dormitóriu ba estudante sira husi ensinu superiór privadu no públiku.
“Loos duni deputadu sira foti kestaun ne’e maibé ami sei halo resposta ofisiál ba sira katak tinan ida-ne’e Governu seidauk hanoin atu halo dormitóriu ba estudante sira”, tenik Ministru.
Antes ne’e, deputadu husi bankada Kongresu Nasionál Rekonstrusaun Timorense (CNRT, sigla portugés), José Virgílio, rekomenda ba MESSK atu tau atensaun ba estudante sira-nia dormitóriu.
Nia dehan, ezekutivu sira bainhira elabora orsamentu tenke konsidera estudante sira-nia preokupasaun hodi bele hasai kualidade ensinu.
Notísia relevante: Deputadu Bankada Governu rekomenda MESSK tau atensaun ba dormitóriu estudante
Jornalista : Osória Marques
Editora : Rita Almeida
