Timor-Leste atribui doasaun rihun $60 ba Reprezentasaun Árabe Saarauí iha Dili

DILI, 26 Fevrereiru 2024 (TATOLI) – Governu atribui doasaun rihun $60 ba Reprezentasaun Permanente Repúblika Árabe Saarauí Demokrátika iha Timor-Leste.

Tuir fonte husi Governu, medida ida-ne’e atu hametin lasu istóriku ne’ebé liga Timor-Leste no Repúblika Árabe Saaraui, bazeia ba dezeju komún hodi luta ba autodeterminasaun, iha prinsípiu solidariedade ba luta povu nian ba libertasaun nasionál no direitu ba autodeterminasaun no independénsia, ne’ebé hatuur iha Konstituisaun Repúblika, iha Rezolusaun Parlamentu Nasionál kona-ba solidariedade no apoiu ba povu Saaraui.

Lembra katak Timor-Leste kontribui husikedas tinan 2011, ba funsionamentu Reprezentasaun Permanente iha Dili, liuhusi fó subsídiu anuál hodi hala’o sira-nia atividade iha Timor-Leste no iha rejiaun ne’e.

Antes ne’e, iha 2024, Governu mós aprova atribuisaun donativu ida ho valór hanesan ba Reprezentasaun Permanente Repúblika Árabe Saarauí Demokrátika iha Timor-Leste.

Notísia relevante : Governu aprova donativu $60.000 ba reprezentasaun Arabe Saharaui iha TL

Jornalista: Arminda Fonseca

Editora: Maria Auxiliadora