OEKUSI, 27 Fevereiru 2025 (TATOLI) – Sekretária Rejionál ba Asuntu Agrikultura, Rejiaun Administrativa Espesiál Oekusi Ambeno (RAEOA), Filomena Sila hamutuk ho ekipa, kinta ne’e, apoia ai-oan 300 atu kuda proteze erosaun ne’ebé afeta ba Eskola Bázika Filiál (EBF) Lamasin suku Bene-Ufe sub-rejiaun Nítibe.
Dirijnte Agrikultura Oekusi ne’e informa apoia ne’e bazea pedidu ne’ebe submete husi komunidade sira no autoridade lokál iha suku Bene-Ufe, ho obetivu kuda hodi proteje rai halai iha eskola EBF Lamasin.
Notísia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe
“Ami mai apoia ai-oan sira-ne’e tanba pedidu mai husi komunidade sira liuliu afeta ba rai halai rezulta eskola Lamasin, tan ne’e ohin ami mai oferese ai-oan tipu lima hamutuk 300, nune’e sira bele kuda iha fatin ne’ebé konsidera risku ba erosaun,” nia dehan iha EBF Lamasin Nítibe, ohin.
Ai-oan tipu lima ne’ebé apoia mak hanesan, ai-kakeu, mahoni, ai-kafe, palm ho du’ut vetiver, tanba ne’e, nia husu komunidade no autoridade lokál iha suku Bene-Ufe presiza kolabora hodi buka fali fatin seluk ba komunidade atu hela tanba fatin referidu konsidera riksu.
“Ha’u espera komunidade sira-ne’ebé hela besik iha fatin eskola ne’e, atubele hamutuk ho xefe suku no aldeia no administradór postu, deskuti atubele buka fali fatin seluk atu ba hela, tanba fatin daudaun hela ba ne’e, ameasadu no risku ba futuru, tanba rai ne’ebé komunidade sira hela ladun seguru atu hela ho hakmatek iha tinan barak tuir mai,” nia fó hanoin.
Iha biban hanesan, Jestór Sub-Rejiaun Nítibe, Agustinho Afulit, agradese ba Autoridade RAEOA liuhusi Sekretária Rejionál Asuntu Agrikultura, tanba ho inisiátiva di’ak, atu-bele apoia ai-oan mai komunidade no aldeia Lamasin.
“Ita haree fatin ne’e kondisaun natureza la favoravél, estrutura rai ladun di’ak, nune’e ameasa ba eskola iha futuru bele akontese estragu, tan ne’e mak inisiátiva di’ak liuhusi koordenasaun ho parte agrikultura halo konservasaun ba rai ne’e atu satan netik erosaun ne’ebé mak afeta maka’as ba eskola inklui uma-kain sira-ne’ebé hela besik, kona-ba komunidade ne’ebé hela iha risku ita komunika no sei buka fali fatin seluk,” nia orgullu.
Entertantu, Koordenadór EBF Lamasin, Lazaro Bacun, rekomenda ba Governu liuliu Ministériu Edukasaun atu tau-matan ba ambiénte eskola Lamasi, tanba komunidade okupa barakliu liu, no laiha espasu sufisiente atu kuda ai-oan no seluk tan.
“Eskola ida-ne’e ita haree ho matan katak ambiente eskola ne’e nia área ki’ikliu, tuir loloos luan to’o metru-300, maibe agora ita haree klo’ot no laiha espasu di’ak, ami iha planu atu proteje ho meiu saida de’it, hanesan ohin mai apoia ai-oan atu proteje maibé fatin ka komunidade hela besikliu, iha eskola sorin komunidade halo lutu tutan kedas iha eksola ninin no iha oin mós rabat loos, tan ne’e ha’u apela ba Governu karik bele haree netik ami nia ambiénte eskola ne’e,” nia rekomenda.
Totál profesór hamutuk na’in-tolu ho estudante na’in-42.
Notísia relevante:PM Xanana vizita Oekusi hodi observa progresu serbisu no funsionamentu administrasaun
Jornalista: Abílio Elo Nini
Editór: Florencio Miranda Ximenes
