Kondisaun Santu Padre di’ak uitoan – Vatikanu
DILI, 27 Fevereiru 2025 (TATOLI) – Kondisaun saúde líder Igreja Katólika, Papa Francisco, aprezenta estadu saúde di’ak uitoan, haktuir husi Vantikanu iha kuarta ne’e (26/02).
“Kondisaun klínika Santu Padre iha última oras 24 aprezenta di’ak uitoan”, Vatikanu informa liuhusi komunikadu, hodi hatutan katak insufisiénsia renál kmaan ne’ebé deteta iha loron hirak ne’e rezolve ona.
“Tomografia tórak ne’ebé hala’o hodi kalan hatudu evolusaun ida normál iha kuadru inflamatóriu pulmonár. Ezame laboratóriu no ematolójiku sira ohin konfirma iha mellora observada iha horisehik”.
Papa Francisco ne’ebé internadu ona durante loron 13 (to’o 26 Fevereiru) iha Ospitál Gemelli, Roma, kontinua ho oksijenoterapia altu fluxu no, to’o agora, la aprezenta krize respiratoria asmátika.
“Fizioterapia respiratória kontinua. Durante iha dadeer, Santu Padre simu eukaristia. Iha loraik dedikada ba atividade serbisu nian”, nota ne’e dehan.
Iha loron 25, Vatikanu fó sai mós katak kondisaun saúde Papa Francisco nafatin krítika, maibé estavel. Hodi hatutan katak laiha epizódiu respiratóriu agudu no parámetru emodinámiku estavel.
“Iha inísiu kalan, submete ba tomografia komputarizada programada ba monitorizasaun radiolójiku pneumonia bilaterál nian”.
Papa Francisco (88) internadu iha ospitál dezde 14 Fevereiru tanba sofre pneumonia bilaterál.
Notísia relevante: Kondisaun saúde Papa hatudu progresu di’ak uitoan maski sei iha estadu krítiku
TATOLI
