DILI, 27 Fevereiru 2025 (TATOLI)-Konsellu Kombatente Libertasaun Nasionál (CCLN, sigla portugés) halo ona desizaun konaba komemorasaun Loron Nasionál Veteranu ba dala-VIII iha tinan 2025 ne’e laiha seremónia boot, maibé hasa’e de’it Bandeira iha Nasionál no CCLN munisipál.
Ministru Asuntu Kombatente Libertasaun Nasionál (MAKLN), Gil da Costa Monteiro Oan Soru, hatete MAKLN ho CCLN daudaun sei konsentra liuba dadus reklamasaun ka kontestasaun hosi lista editál kombatente rejistadu iha segundu rejístu 2009 nian ne’ebé publikadu iha loron 15 fulan-Janeiru.
Nia dehan desizaun ne’e maihusi reuniaun ezekutivu sira iha CCLN, tanba Estatutu Kombatente Libertasaun mós temi, komemorasaun sira ba Loron Nasionál Veteranu ne’e CCLN mak organiza.
“Ami ministériu ho CCLN sei hasa’e de’it bandeira iha primeira semana iha segunda”, dehan Oan Soru iha MAKLN, Komoro, kinta ne’e.
Daudaun ne’e reklamasaun no kontestante hamutuk 11,045, ne’ebé tenke foku ba servisu. “Orsamentu komemorasaun loron nasionál veteranu tinan ne’e, MAKLN prevee rihun $100. Maibé ita tama ona ho servisu ida ne’ebé mak okupadu tebes-tebes, ho nune’e seremónia la halo”.
“CCLN sei orienta ba CCLN munisipál sira, hasa’e de’it Bandeira iha sira-nian sede”, tenik Oan Soru.
Istória 3 Marsu 1981 konsagra ona hosi Estadu Timor-Leste liuhosi lei no 3/ 2016 nu’udar loron veteranu sira-nian. Loron istórika ne’e maihusi konferénsia nasionál Fretilin nian iha Maubai-Vikeke iha loron 3 fulan-Marsu, orientasaun hosi membru Komité Sentrál Fretilin (CCF, sigla portugés) sobrevivente na’in-rua, Kay Rala Xanana Gusmão ho Mau-hunu Bulere Karatayano.
Konferensista sira hili CCF nian na’in-sia foun hodi foti dezisaun importante lubuk ida, hodi organiza ka reorganiza luta Libertasaun Nasional iha teritóriu tomak.
Notísia relevante: Tinan ne’e Governu la komemora loron veteranu
Jornalista : Osória Marques
Editora : Rita Almeida
