DILI, 26 Fevereiru 2025 (TATOLI)-Governu liuhusi Ministériu Asuntu Kombatente Libertasaun Nasionál (MAKLN), la komemora loron veteranu ne’ebé sei akontese iha 03 Marsu tinan ne’e, tanba okupadu ho atividade balun.
“Loron veteranu ne’e serimónia laiha, ne’e konforme konsellu veteranu mak informa ba ha’u, katak serimónia sira sei la organiza tanba sira sei foka ba atividade sira-ne’ebé agora iha ne’e (lista reklamasaun no kontestasaun ba lista veteranu nian)”, Ministru Gil da Costa Monteiro Oan Soru, dehan iha Palásiu Governu, kuarta ne’e.
Nia dehan, Ministériu ho Konsellu Kombatente Libertasaun Nasionál (CCLN-sigla portugés) mak servisu hamutuk ba asuntu ida-ne’e.
Hatutan tan, tinan hirak ba kotuk, Komandante ein-xefe Kay Rala Xanana Gusmao, halo polítika tuir ema hotu-hotu nian, ikus mai hetan independénsia to’o ohin loron mós sei kontinua luta ba dezenvolvimentu povu no nasaun.
Iha Konstituisaun RDTL artigu 11 (Fó valór ba Rezisténsia) iha alinea 1 hateten, Repúblika Demokrátika Timor-Leste rekoñese no fó valór ba povu Maubere nia rezisténsia tinan atus ba atus hasoru dominasaun hosi rai-li’ur no mós ba sira hotu ne’ebé fó kontribuisaun hodi luta ba independénsia nasionál.
Iha iha alinea 3 hateten, Estadu asegura protesaun espesiál ba mutiladu funu nian, oan-ki’ak no mós sira seluk tan ne’ebé fó-an tomak ba luta independénsia no soberania nasionál nian, no proteje mós sira hotu ne’ebé partisipa ona iha Rezisténsia hodi hasoru okupasaun hosi rai seluk, tuir lei haruka.
Bazea ba artigu ida-ne’e maka iha Governu estabelse Dekretu-Lei Nú. 3/2016, ne’ebé Estadu Timor-Leste konsagra loron 3 marsu nu’udar loron nasionál ba veteranu sira.
Estadu deside loron 3 marsu ne’e sai Loron Nasionál veteranu tanba iha loron 3 Marsu 1981, Timor-Leste hahú reorganiza funu ba libertasaun nasional, hafoin baze-de-apoiu rahun.
Data istórika ne’e liga ba Konferensia Nasionál FRETILIN iha Maubai (Viqueque) no iha loron 3 marsu ho orientasaun hosi membru Comite Central FRETILIN (CCF) sobrevivente na’in-rua, Xanana Gusmão no Ma’Huno, no konferensista sira hili membru CCF na’in-sia (9) foun tán no foti desizaun importante lubuk ida, hodi reorganiza luta libertasaun nasionál iha territóriu tomak.
Hosi konferensia ida-ne’e mak rezisténsia armada moris fila-fali iha ai-laran no povu hetan fali nia esperansa no halo mundu hakfodak.
Selebrasaun dahuluk ba Loron Nasionál Veteranu ne’e, akontese iha tinan 2017. Veteranu no Kombatente Libertasaun Nasionál sira mak kompostu hosi frente armada, frente klandestina no frente esterna ka diplomátika.
Notísia relevante: CCLN relata preparasaun selebra loron nasionál no kriasaun fundu veteranu ba PM
Jornalista : Osória Marques
Editora : Rita Almeida
