OEKUSI, 27 Fevereiru 2025 (TATOLI) – Sekretáriu Rejionál ba Asuntu Agrikultura, Filomena Sila, kinta ne’e, hala’o observasaun ba iha ai-kameli 2000-resin ne’ebé kuda iha área Panamtasa, suku Suni-Ufe, sub-rejiaun Nítibe hatudu 75% mak konsege moris.
Ai-kameli hirak-ne’e kuda iha loron nasionál ai-kameli ne’ebe realiza iha loron 13 Janeiru foin lalais, nu’udar programa nasionál ne’ebé implementa liuhusi kooperasaun entre Sekretária Rejionál Agrikultura, Dirasaun Rejionál Agrikultura Oé-Cusse hamutuk ho Governu Sentrál liuhusi Ministériu Agrikultura Pekuária, Peska no Floresta (MAPPF).
Notísia relevante:MAPPF kuda ai-kameli rihun 3-resin iha Nítibe
“Ita lansa ona iha loron nasionál ne’e hodi kuda ai-kameli 2000-resin iha loron 13 Janeiru foin lalais ne’e, ohin ita mai observa katak iha baluN mate, maibé maioria 75% mak moris tanba agora tempu udan,” Sekretária Rejionál Agrikultura ne’e, informa iha suku Suni-Ufe Oekusi, ohin.
Tuir planu sei kuda tan hun 1000 tanba ai-oan hirak-ne’e hetan apoia maioria mai husi Ministériu Agrikultura Pekuária, Peska no Floresta (MAPPF).
“Agora hatuun ona iha sentru viveiru kampaun diresaun ne’ebé iha ai-kameli 1000 sei kuda tan iha fatin ne’e, tanba área ne’e ita sei kuda ba ektare 5, maibé foin lalais ita kuda de’it ektare 3 no fatin ne’e seguru tanba ita halo morru hale’u no mós destaka funsionáriu guarda floresta sira mak halo monitorizasaun kada loron,” nia dehan.
Antes ne’e, Jestór sub-rejiaun Nítibe, Agustinho Afulit, agradese ba Governu tanba tinan ne’e hili sub-rejiaun Nítibe sai fatin kuda ai-kameli iha suku Suni-Ufe.
“Foin daudaun iha lansamentu ne’e ami simu ona rekomendasaun atu kuidadu ai-oan sira-ne’e, ne’ebé ami mós iha ona hanoin atu halo tara-bandu, nune’e iha tempu badak ami sei ko’alia ho lia-na’in suku lima iha Nítibe atu kria regulamentu ka tara-bandu, atu bandu labele lere to’os besik inklui labele husik animál atu estraga lutu ne’ebé harii ona,” nia orgullu
Notísia relevante:MAPPF halo produsaun viveiru ai-kameli hamutuk 600.000 iha tinan 2023
Jornalista: Abílio Elo Nini
Editór: Florencio Miranda Ximenes
