DILI, 28 Fevereiru 2025 (TATOLI)-Deputadu membru komisaun E ne’ebé trata asuntu Infraestrutura iha Parlamentu Nasionál (PN), Oscar Lima, husu Governu liuhusi ministériu kompetente tau atensaun ba ponte Loes iha munisípiu Likisá.
“Preokupasaun ponte ida-ne’e, Governu atu responde”, nia hato’o iha resintu PN, ohin. Hodi hatutan, ninian parte sei halo fiskalizasaun hodi haree besik kondisaun atuál.
Sorin seluk, Deputada FRETILIN, Lidia Norberta, dehan nia-parte semana kotuk hala’o kontaktu eleitorál iha suku Gixu, postu administrativu Loes, populasaun hato’o preokupasaun relasiona ho mota Loes ne’ebé sobu komunidade sira-nia fatin.
“Deputadu sira iha ne’e hatete katak ponte Loes ne’e atu kotu, maibé iha semana kotuk ha’u mós hatete ponte labele kotu, tenke rezolve husi kedas fronteira Faularan tun mai Gixu, Lisadila, Bubuleu tama to’o Fatukero ne’e importante tebes, tanba mota ne’e sobu fatin barak”, dehan nia.
Nia akresenta, atuál Prezidente Repúblika iha 2014 bá Loes nota katak, totál rai ne’ebé mak mota lori hamutuk ektare 240, agora liu tinan 11 bele aumenta.
“Prova mak populasaun lamenta, rai besik ektare 10 kuda batar iha tinan ida nian mota lori, tanba ne’e mak husu Governu halo intervensaun”, katak nia.
Nia hateten tan, iha área Gixu iha sentru saúde, eskola, eskuadra polísia, nune’e presiza intervensaun.
Antes ne’e, iha reuniaun plenária PN Deputadu balun levanta ona kestaun ne’e no reprezentante Governu liuhusi Vise Ministru asuntu Parlamentár, Adérito Hugo da Costa, rejista preokupasaun no sei enkamina ba ministériu kompetente hodi bele tau atensaun.
Notísia relevante: Governu presiza rezolve estrada liga husi ponte Loes ba Hataz
Jornalista : Nelson de Sousa
Editora : Rita Almeida
