BOBONARO, 29 abríl 2024 (TATOLI)-Líder komunitária husu governu atu tau prioridade iha orsamentu jerál tinan 2025 hodi rezolve kondisaun estrada ligasaun husi área ponte Loes, suku Atabae ba suku Hataz, postu administrativu Atabae, munisípiu Bobonaro, hodi bele fasilita movimentasaun públiku.
Xefe suku Atabae, Juvinál Reis Cardoso, hateten kondisaun estrada ne’e sai preokupasaun ba komununidade sira liu-liu iha tempu udan tanba kondisaun ladiak, nakonu ho tahu dodok.
Notísia relevante: Kondisaun estrada difikulta projetu Uma Kbiit Laek iha Hataz
“Ami suku ida-ne’e susar tebes, liu-liu konaba estrada, dalaruma ami-nia komunidade atu lori sira-nia produtu lokál ba merkadu susar tebes,” nia informa ba jornalista sira iha Atabae, segunda ne’e.
Juvinál afirma proposta konaba estrada ne’e hato’o beibeik ba ministeriu kompetente, dezde mandatu Xefe suku sesante, maibé to’o agora laiha rezultadu.
“Ha’u hanesan autoridade lori povu nia naran rekomenda ba governu sé bele hadi’a ami-nia estrada, tanba estrada mak sai xave ba dezenvolvimentu, bainhira ita-nia povu atu moris di’ak no halo mudansa primeiru liuhusi estrada,” nia fó hanoin.
Prezidente Autóridade Munisipál Bobonaro, Alexandrino Pires, rekoñese kondisaun estrada refere grave,nmaibé Autoridade munisípiu laiha kompeténsia atu rezolve tanba obra ne’e kategoria grande projetu.
“Ha’u triste tebes la halimar, tanba ne’e desde tempu Indonezía to’o agora seidauk iha ema ida tau planu, maibé ha’u rona Katak iha kompañia balu mak halo ona site visited, maibé ne’e fila fali ba nasionál tanba ne’e tanba grande projetu, ne’ebé nasionál nia kompeténsia, atu hahú estrada ne’e husi ponte Loes ba to’o Nunura ne’ebá to’o Mau-Mali,” nia katak.
Lider masimu iha Autóridade Munisipál Bobonaro ne’e haktuir problema konaba estrada referidu, nia parte hato’o ona ba Ministru Administrasaun Estatál atu ko’alia ho ministériu kompetente, nune’e bele buka solusaun.
Tuir nia, governu presiza tau prioridade tanba estrada ne’e bele sai alternativa, bainhira estrada sira ligasaun husi Ponte Loes ba to’o Balibo grave no kotu totál iha tempu udan.
“Ha’u fiar katak movimentu kareta sei liu husi ne’e hotu, tanba ba Dili besik liu la presiza haleu husi Balibo ba Batugade, entaun estrada ida ne’e iha produtu lokál iha suku rua ne’e bele fasilita ona tama ba merkadu Dili no Maliana,” nia katak.
Enkuantu estrada referidu mos liga husi postu administrativu Atabae ba postu administrativu Cailaco no kapitál Maliana, maibé presiza mos halo konstrusaun ba ponte Nunura II.
Notísia relevante: Ekipa MOP hahú dezeña futuru Ponte Nunura II
Jornalista: Sérgio da Cruz
Editór: Evaristo Soares Martins
