DILI, 28 Fevereiru 2025 (TATOLI) – Komisaun Nasionál Timor-Leste (CNTL, sigla portugés) husi Organizasaun Nasaun Unida ba Edukasaun, Siénsia no Kultura (UNESCO, sigla portugés) disponibiliza, iha 2024, formasaun iha astronomia ba profesór na’in-73.
Diretór-Ezekutivu CNTL, Luís Nívio Soares, hateten objetivu husi formasaun ne’e hakarak atu fó hanorin profesór sira kona-ba prevensaun no utilizasaun materiál ba observasaun fenómenu sira hanesan eklipse solár (loron mate) nian iha terrenu bainhira akontese ida-ne’e.
Nia esplika razaun sira realiza formasaun ne’e tanba, iha 2023, bainhira akontese fenómena eklipse solár ne’e populasaun ladún iha koñesimentu di’ak kona-ba fenómena ne’e no utilizasaun materiál ba prevensaun nian. Tanba ne’e mak UNESCO aprezenta proposta formasaun ba parseiru International Astronomical Union (IAU) hodi hetan fundu hamutuk rihun $11.
“Ami konsege fó formasaun ba profesór hamutuk 73 liuhusi semináriu nasionál ne’ebé hala’o iha Dili no iha munisípiu Vikeke no Baukau”, Luís Soares informa ba Tatoli.
Luís Soares subliña katak formasaun ne’ebé introdús ba manorin sira kona-ba esperiénsia observa fitun sira hodi apreende konseitu báziku no metodolojia astronomia nian.
Ba tinan ida-ne’e, UNESCO sei iha orsamentu hodi kontinua fó formasaun astronomia nian ba profesór na’in-15 husi Likisá hodi termina programa ne’e.
Notísia relevante: INCT-UNESCO realiza konsulta nasionál ba implementasaun siénsia aberta
Jornalista: Arminda Fonseca
Editora: Maria Auxiliadora
