DILI, 28 Fevereiru 2025 (TATOLI)-Prezidente Komisaun F Parlamentu Nasionál ne’ebé trata asuntu Saúde, Igualdade Jeneru no Inkluzaun Sosiál, hatete daudaun ne’e Ministériu Saúde rigór tebes atu halo aprovasaun ba junta médika.
“Observa, Ministra Saúde foti desizaun ida ne’ebé la naran haruka ema bá li’ur, maibé presiza haree pasiente ne’e haruka bá li’ur ou la presiza”, dehan deputada Maria Gorumali Barreto ba TATOLI iha resintu PN.
Nia haktuir, uluk laiha kontrolu atu haruka pasiente bá li’ur, balun bá la tuir prosedimentu no la prenxe kriteria, bá-tiha mai husu rembolsa, ida ne’e mak problema, to’o ikus halo dívida ne’ebé boot.
Deputada husi bankada Kongresu Nasionál Rekonstrusaun Timorense (CNRT, sigla portugés) hateten, komisaun simu ona informasaun husi ministériu iha semana rua liu-bá atu halo pagamentu dívida ospitál rai-li’ur millaun $8.9, no kontinua verifika fatura seluk loos ona kontinua pagamentu.
Ba prosesu transferénsia pasiente ba rai-li’ur hahú la’o fali no tau prioridade liu ba pasiente urjente no tuir prosedimentu ne’ebé MS uza.
Notísia relevante: Governu selu ona dívida millaun $9 ba ospitál estranjeiru
Jornalista : Nelson de Sousa
Editora : Rita Almeida
